حیدرآباد:ویب ڈیسک
بھارتی ریاست آندھرا پردیش میں سالانہ روایتی تہوار کے دوران منائی جانے والی لاٹھیوں کی علامتی جنگ اس وقت شدید خونی تصادم میں بدل گئی جب دونوں فریقین میں شدید جھگڑا شروع ہو گیا۔ اس پُرتشدد واقعے کے نتیجے میں ایک شخص ہلاک جبکہ 100 سے زائد افراد زخمی ہو گئے۔مقامی ذرائع کے مطابق، ہر سال روایتی جوش و خروش کے ساتھ منائے جانے والے اس تہوار میں فریقین کے مابین لاٹھیوں کے تبادلے کی علامتی رسم ادا کی جاتی ہے، تاہم اس بار یہ مقابلہ آپسی کشیدگی اور تلخ کلامی کے باعث ایک حقیقی اور خونریز لڑائی میں تبدیل ہو گیا۔ جھگڑے کے دوران شدید لاٹھی چارج اور پتھراؤ سے بھگدڑ مچ گئی، جس سے متعدد افراد شدید زخمی ہو گئے۔واقعے کی اطلاع ملتے ہی پولیس اور ریسکیو ٹیمیں فوری طور پر موقع پر پہنچ گئیں اور زخمیوں کو قریبی اسپتالوں میں منتقل کیا جہاں بعض کی حالت نازک بتائی جا رہی ہے۔ پولیس نے علاقے میں سیکیورٹی سخت کرتے ہوئے واقعے کی تحقیقات کا آغاز کر دیا ہے تاکہ تصادم کے ذمہ داران کا تعین کیا جا سکے۔