لاہور (خصوصی رپورٹ): وزیراعلیٰ پنجاب مریم نواز شریف سے سعودی عرب کے نئے تعینات ہونے والے سفیر ڈاکٹر راجح البقمی (H.E. Dr. Rajeh Albugamy) نے ملاقات کی، جس میں باہمی دلچسپی کے امور، اقتصادی تعاون، تجارتی شراکت داری اور علاقائی سلامتی سے متعلق اہم موضوعات پر تفصیلی تبادلہ خیال کیا گیا۔ وزیراعلیٰ مریم نواز شریف نے نئے سعودی سفیر کا پُرتپاک خیرمقدم کرتے ہوئے انہیں سفارتی ذمہ داریاں سنبھالنے پر مبارکباد دی اور پاکستان کے لیے سعودی عرب کی مسلسل مالی و اقتصادی معاونت پر سعودی قیادت کا شکریہ ادا کیا۔
ملاقات کے دوران پنجاب سے سعودی عرب کو زرعی اور غذائی مصنوعات بالخصوص لائیو اسٹاک، بیف، پولٹری، آم، کینو، آلو اور شریمپ کی برآمدات بڑھانے کے لیے پنجاب کی صلاحیتوں سے بھرپور فائدہ اٹھانے پر اتفاق کیا گیا۔ دونوں رہنماؤں نے ان شعبوں میں 500 بلین روپے سے زائد کا تجارتی ہدف مقرر کرنے پر اتفاق کیا، جبکہ پنجاب میں سرمایہ کاری کے فروغ کے لیے ریاض میں پیوٹ کاروڈ شو (Pivot Roadshow) کے انعقاد کی تجویز پر بھی بات چیت کی گئی۔ وزیراعلیٰ نے کہا کہ پنجاب مملکت سعودی عرب کو اعلیٰ معیار کی حلال تصدیق شدہ خوراک فراہم کرنے والا قابل اعتماد شراکت دار بن سکتا ہے۔
ملاقات میں امن و امان اور دفاعی تعاون پر گفتگو کرتے ہوئے اگست 2026 کے مکہ مشترکہ دفاعی معاہدے کو باہمی تعلقات میں ایک نئے دور کا آغاز قرار دیا گیا۔ وزیراعلیٰ مریم نواز شریف نے حوثی باغیوں کی جانب سے سعودی عرب کی حدود اور شہری انفراسٹرکچر پر حملوں کی شدید الفاظ میں مذمت کی اور انسانی جانوں کے ضیاع پر گہرے دکھ کا اظہار کیا۔ انہوں نے کہا کہ مکہ مکرمہ اور مدینہ منورہ کے تقدس پر حملہ کرنے کی کوئی بھی کوشش ناقابلِ برداشت ہے، اور پاکستان اپنے برادر ملک سعودی عرب کی خود مختاری اور دفاع کے حق کی مکمل حمایت کرتا ہے۔
وزیراعلیٰ نے کہا کہ خادمینِ حرمین شریفین اور سعودی عرب ہر پاکستانی کے دل میں محترم مقام رکھتے ہیں، اور محمد نواز شریف و سعودی قیادت کے درمیان دہائیوں پر محیط تعلقات اعتماد کا بہترین مظہر ہیں۔ انہوں نے مزید بتایا کہ تقریباً 9.8 ارب ڈالر کی ترسیلاتِ زر کے ساتھ سعودی عرب پاکستانی معیشت کے لیے اہم ترین ستون ہے۔ اس موقع پر وزیراعلیٰ نے سعودی شہریوں کو پنجاب کی تاریخی و ثقافتی سائٹس کے دوروں کی بھی دعوت دی۔
سعودی سفیر ڈاکٹر راجح البقمی نے پاکستان کی حکومت، مسلح افواج اور عوام کی جانب سے سعودی عرب کی سلامتی اور علاقائی سالمیت کے لیے غیر متزلزل حمایت پر اظہارِ تشکر کیا۔ انہوں نے لاہور کی تاریخی اہمیت اور مہمان نوازی کی تعریف کرتے ہوئے کہا کہ پنجاب کا تاریخی ورثہ، بالخصوص مغلیہ یادگاریں اور ثقافت، سعودی سیاحوں کے لیے بہترین کشش کا باعث ہیں۔