ملتان (رپورٹ: ملک جابر عباس)
ملتان ڈویژن میں انتظامی ہلچل تیز ہو گئی ہے جہاں کمشنر ملتان ڈویژن عامر کریم خان کی زیرِ صدارت ایک ہنگامی اور اہم اجلاس منعقد ہوا۔ اجلاس میں شہر کے بگڑتے ہوئے ٹریفک نظام اور ترقیاتی منصوبوں کی سست رفتار پر کڑے فیصلے کیے گئے ہیں تاکہ شہریوں کو طویل اذیت سے نجات دلائی جا سکے۔اجلاس کے دوران شہر کے اہم ترین مقامات — رضا آباد چوک، چونگی نمبر ایک اور فوارہ چوک — پر خراب اور بند پڑے ٹریفک سگنلز کی فوری مرمت نہ ہونے پر سخت نوٹس لیا گیا اور متعلقہ حکام کو فوراً درستگی کی ہدایات جاری کی گئیں۔ علاوہ ازیں، بوسن روڈ پر حادثات کی روک تھام اور ٹریفک کو منظم کرنے کے لیے خصوصی طور پر کیٹ آئیز (Cat Eyes) نصب کرنے کا حکم دیا گیا ہے۔کمشنر ملتان نے واضح کیا کہ شہر کی اہم شاہراہوں پر کارپٹنگ، لین مارکنگ اور مرمتی کاموں میں مزید تاخیر برداشت نہیں کی جائے گی۔ ٹریفک کی روانی کو یقینی بنانے کے لیے عام خاص باغ چوک کے مرکزی میڈین کا کٹ بند کرنے اور اس کے جزیرے (Island) کی فوری تبدیلی کی تجویز پر بھی عملدرآمد کا فیصلہ کیا گیا ہے۔