واشنگٹن ڈی سی :ٹیلی ویژن نیٹ ورک ’’فوکس نیوز‘‘ نےعلان کیا ہے کہ وائٹ ہاؤس کی سابق ترجمان اور صدر ڈونلڈ ٹرمپ کی قریبی اتحادی کیرولین لیویٹ ’’تبصرے اور تجزیے‘‘ پیش کرنے کے لیے نیٹ ورک میں شامل ہوں گی۔
فوکس نیوز میڈیا کی چیف ایگزیکٹو سوزن اسکاٹ کے جاری کردہ بیان کے مطابق لیویٹ یکم نومبر سے ’’فوکس نیوز‘‘ پر نظر آئیں گی۔
فرانسیسی پریس کے مطابق سوزن اسکاٹ نے وائٹ ہاؤس کی سابق ترجمان کی موجودہ سیاسی منظرنامے پر ’’گہری سمجھ‘‘ کو سراہا۔دوسری جانب لیویٹ نے کہا:میں وائٹ ہاؤس کی ترجمان کی حیثیت سے اپنے تجربے سے حاصل ہونے والی منفرد بصیرت ناظرین تک پہنچانے کی منتظر ہوں، اس دوران وہی توانائی اور دوٹوک انداز برقرار رکھوں گی جو میری ذمہ داری کے دور کی نمایاں خصوصیات تھیں۔
یاد رہے کہ لیویٹ نے موسم بہار میں اپنے دوسرے بچے کو جنم دینے کے بعد اگست کے آخر میں اپنے عہدے سے استعفیٰ دے دیا تھا تاکہ اپنی فیملی پر توجہ مرکوز کر سکیں۔
تاہم انہوں نے اس عزم کا بھی اظہار کیا تھا کہ وہ ’’میگا‘‘ (امریکہ کو دوبارہ عظیم بنائیں) کے نظریے کی حمایت جاری رکھیں گی۔وہ اپنے سابق عہدے پر فائز رہنے کے دوران بھی باقاعدگی سے ’’فوکس نیوز‘‘ کی مہمان کی حیثیت سے پروگراموں میں شریک ہوتی رہی تھیں۔
دوسری جانب ٹرمپ نے ابھی تک وائٹ ہاؤس کے لیے نیا ترجمان مقرر نہیں کیا۔ان کے عہدہ چھوڑنے کے بعد سے وائٹ ہاؤس نے باقاعدہ پریس بریفنگز کا سلسلہ بھی روک دیا ہے۔
