مری: سکول وین میں آتشزدگی سے طلبہ کے جھلسنے کا واقعہ، وزیراعلیٰ مریم نواز نے رپورٹ طلب کر لی

مری: وزیراعلیٰ پنجاب مریم نواز شریف نے مری میں سکول وین میں آگ لگنے کے حادثے میں طلبہ کے جھلس کر زخمی ہونے پر گہرے دکھ اور افسوس کا اظہار کیا ہے اور واقعے کی فوری رپورٹ طلب کر لی ہے۔
وزیراعلیٰ کیپٹن (ر) مریم نواز شریف کی سخت ہدایات پر ڈپٹی کمشنر مری ظہیر شیرازی فوری طور پر جائے حادثہ پر پہنچے اور امدادی کارروائیوں کی نگرانی کرتے ہوئے زخمی بچوں کو فوری طور پر ہسپتال منتقل کیا۔ وزیراعلیٰ نے ہولی فیملی ہسپتال میں زیرِ علاج بچوں کے بہترین علاج معالجے کو یقینی بنانے کی ہدایت کرتے ہوئے کمشنر راولپنڈی کو خود علاج کے عمل کی نگرانی کرنے کا حکم دیا ہے۔
مڈل اسکول کی وین میں پیش آنے والے اس واقعے کی ابتدائی رپورٹ موصول ہونے کے بعد وزیراعلیٰ نے گاڑی میں اوور لوڈنگ اور آتشزدگی سے بچاؤ کے لیے حفاظتی انتظامات نہ ہونے پر سخت نوٹس لیا ہے۔ انہوں نے واضح کیا کہ سکول وینز کی فٹنس اور حفاظتی ایس او پیز پر کسی قسم کی کوتاہی برداشت نہیں کی جائے گی اور اس حوالے سے زیرو ٹالرنس پالیسی اپنائی جائے گی۔
مریم نواز شریف نے افسوس کا اظہار کرتے ہوئے کہا کہ سکول وینز کی حفاظت کے بارے میں سخت اور واضح احکامات جاری کرنے کے باوجود ان پر مکمل عمل درآمد نہ ہونا ایک انتہائی تکلیف دہ اور افسوسناک امر ہے۔