ڈھاکہ: بنگلہ دیش کرکٹ بورڈ (بی سی بی) نے ڈومیسٹک کرکٹ میں انقلاب لانے کے لیے کرکٹ کی تاریخ کا پہلا ’آل فارمیٹ فرانچائز ٹورنامنٹ‘ (D3) متعارف کروا دیا ہے۔ اس جدید اور منفرد اقدام کے تحت حصہ لینے والی تمام ٹیمیں ایک ہی سیزن کے دوران کرکٹ کے تینوں اہم فارمیٹس میں مدِمقابل ہوں گی۔
افتتاحی ایڈیشن کے لیے چھ مختلف تجارتی کمپنیوں نے فرانچائزز کی ملکیت حاصل کر لی ہے۔
روایتی ٹی 20 لیگز کے برعکس، اس ٹورنامنٹ میں ہر فرانچائز سیزن کے دوران تینوں فارمیٹس کا حصہ بنے گی
بی سی بی نے تمام فرانچائز مالکان کے ساتھ 3 سالہ معاہدے پر دستخط کیے ہیں، جس کے تحت مالکان بورڈ کو 2.5 کروڑ بنگلہ دیشی ٹکا (25 ملین BDT) کی رقم ادا کریں گے۔
بنگلہ دیش کرکٹ بورڈ کے مطابق اس اقدام کا بنیادی مقصد ملکی ڈومیسٹک کرکٹ کے ڈھانچے کو نئی توانائی فراہم کرنا اور نچلی سطح پر نجی سرمائے کو راغب کرنا ہے۔ اس سے نہ صرف کھلاڑیوں کو ہر فارمیٹ کی تکنیکی مہارت اور صلاحیتوں کو نکھارنے کا موقع ملے گا بلکہ بنگلہ دیشی کرکٹ کو بھی ایک نیا نکھار حاصل ہوگا۔