چکوال (رپورٹ: مہتاب نصیر اعوان) چکوال تا جہلم مین روڈ پر چتال، کھیوال اور سرکال کے مقامات پر سڑک کے دونوں اطراف اور درمیان میں موجود بڑی جھاڑیاں اور کانٹے دار درخت سڑک کے اوپر تک جھک آئے ہیں، جس کے باعث ٹریفک کی روانی اور ڈرائیورز کی حدِ نگاہ شدید متاثر ہو رہی ہے۔
تفصیلات کے مطابق سڑک پر جھکی ہوئی یہ جھاڑیاں خصوصاً رات کے وقت اور اوورٹیکنگ کے دوران انتہائی خطرناک صورتحال پیدا کر رہی ہیں۔ سامنے سے آنے والی گاڑی بروقت نظر نہ آنے یا جھاڑیوں سے بچنے کی کوشش میں گاڑی کے بے قابو ہونے سے ہر وقت حادثہ پیش آنے کا خدشہ رہتا ہے، جبکہ موٹر سائیکل سواروں کے لیے بھی سفر انتہائی غیر محفوظ ہو چکا ہے۔
مقامی شہریوں نے ایکسین ہائی وے چکوال، ڈپٹی کمشنر چکوال، اسسٹنٹ کمشنر چکوال اور دیگر متعلقہ حکام سے اس صورتحال کا فوری نوٹس لینے کی اپیل کی ہے۔ شہریوں کا کہنا ہے کہ کسی بڑے حادثے کا انتظار کرنے کے بجائے چتال، کھیوال اور سرکال کے قریب سڑک پر جھکی ہوئی جھاڑیوں اور کانٹے دار درختوں کی فوری کٹائی اور صفائی کروائی جائے تاکہ ٹریفک کی روانی محفوظ بنائی جا سکے اور ممکنہ جانی و مالی نقصان سے بچا جا سکے۔