بنکاک (نیوز ڈیسک) تھائی لینڈ کے دارالحکومت بنکاک میں گزشتہ 48 گھنٹوں کے دوران 300 ملی میٹر سے زائد مسلادھار بارش کے بعد شدید سیلابی صورتحال پیدا ہو گئی ہے۔ پیدا شدہ اضطراری صورتحال کے پیش نظر بنکاک انتظامیہ نے شہر کے تمام 50 اضلاع کو باضابطہ طور پر ‘آفت زدہ’ (Disaster Zone) قرار دے دیا ہے۔
بارشوں کے باعث شہر کا نالوں اور نہروں پر مشتمل نظام مکمل طور پر بھر کر سڑکوں اور رہائشی علاقوں میں اوور فلو ہو چکا ہے، جس سے متعدد اہم شاہراہیں اور گلی کوچے کمر تک پانی میں ڈوب گئے ہیں۔ متاثرہ علاقوں سے شہریوں کو محفوظ مقامات پر منتقل کیا جا رہا ہے، جبکہ شہر کے مختلف اسکولوں میں عارضی شیلٹر ہاؤسز قائم کر دیے گئے ہیں۔
بنکاک کے گورنر چاڈچارٹ ستی پنت نے شہریوں کو غیر ضروری سفر سے گریز کرنے اور گاڑیوں کو اونچے مقامات پر پارک کرنے کی ہدایت کی ہے۔ انتظامیہ کی جانب سے سیلابی پانی کی روک تھام کے لیے 10 لاکھ ریت کی بوریاں تقسیم کی جا رہی ہیں، جبکہ تمام واٹر پمپنگ اسٹیشنز کو پوری صلاحیت پر چلا کر پانی نکالنے کی کوشش کی جا رہی ہے۔
شہر میں سیلاب کی سنگین صورتحال کے باعث تھائی لینڈ کے وزیراعظم انوتین چارنویراکول نے اپنا لندن کا سرکاری دورہ مختصر کر کے فوری وطن واپسی کا فیصلہ کیا ہے۔ محکمہ موسمیات نے خبردار کیا ہے کہ خطے میں کم ہوا کا دباؤ اور مون سون کا دباؤ برقرار رہنے کے باعث آئندہ دنوں میں مزید بارشوں کا امکان ہے۔