واشنگٹن:عدالتی حکم کے بعد وائٹ ہاؤس نے سی این این (CNN)، ایم ایس ناؤ (MS NOW) اور پولیٹیکو (Politico) کے رپورٹرز کو پریس پاسز واپس کرتے ہوئے دوبارہ وائٹ ہاؤس میں داخلے کی اجازت دے دی ہے۔
یہ اہم پیش رفت ایک ایسے عدالتی حکم کے چند گھنٹوں بعد سامنے آئی جس میں ٹرمپ انتظامیہ کو فوری طور پر ان میڈیا اداروں کے اسناد بحال کرنے کا حکم دیا گیا تھا۔ اس پابندی کے خلاف دیگر میڈیا اداروں کی جانب سے احتجاجاً بائیکاٹ بھی کیا گیا تھا جس سے امریکی عوام کو صدر ٹرمپ کی سرگرمیوں کی اہم بصری کوریج سے محروم ہونا پڑا تھا۔
اس قانونی کشمکش کا آغاز اس وقت ہوا جب پیر کے روز ان تینوں اداروں نے وائٹ ہاؤس کی جانب سے ویک اینڈ پر ان کا داخلہ بند کیے جانے کے خلاف پہلی آئینی ترمیم (First Amendment) کے تحت مقدمہ دائر کیا۔ اس کیس کی سماعت کرنے والے جج، ٹیموتی جے کیلی نے اپنے فیصلے میں قرار دیا کہ انتظامیہ نے مبینہ طور پر میڈیا اداروں کے پانچویں آئینی ترمیم (Fifth Amendment) کے حقوق کی خلاف ورزی کی ہے، جس پر عدالت نے 14 دن کے لیے عارضی حکم امتناعی جاری کرتے ہوئے ان کا داخلہ فوری بحال کرنے کا حکم دیا۔
یہ بھی پڑھیں :
میڈیا چینلز کا سی این این سے اظہار یکجہتی، صدر ڈونلڈ ٹرمپ کی کوریج روک دی
عدالتی حکم کے بعد اگرچہ رپورٹرز کے بیجز واپس کرنے کی کارروائی شروع کر دی گئی تھی، تاہم چینی صدر شی جن پنگ کے دورے کے موقع پر کوریج کے حوالے سے کچھ دیر تک ابہام برقرار رہا۔ جج نے اس معاملے پر مزید سماعت کے لیے 28 ستمبر کی ڈیڈ لائن مقرر کی ہے تاکہ عارضی حکم امتناعی کو طویل مدتی حکم میں تبدیل کیا جا سکے، جبکہ وائٹ ہاؤس کی جانب سے اس فیصلے کے خلاف اپیل کے امکانات کا بھی جائزہ لیا جا رہا ہے۔
”اتفاق میں برکت“: وائٹ ہاؤس نے سی این این اور دیگر معطل شدہ میڈیا آؤٹ لیٹس کی رسائی بحال کر دی
