راولپنڈی :سیکیورٹی فورسز نے بلوچستان کے علاقے قلات میں قومی شاہراہ (چمن-کراچی روڈ، N-25) پر بڑی کارروائی کرتے ہوئے بھارت کی سرپرستی میں چلنے والے دہشتگرد گروہ ’فتنہ الہندستان‘ کے 5 دہشتگردوں کو جہنم واصل کر دیا ہے، جبکہ دہشتگردوں کے چنگل سے 23 مغوی بازیاب کرا لیے گئے ہیں۔
پاک فوج کے شعبہ تعلقات عامہ (ISPR) کے مطابق 18 اور 19 ستمبر 2026 کی درمیانی شب، ’فتنہ الہندستان‘ سے وابستہ دہشتگردوں نے قلات کے قریب قومی شاہراہ پر زبردستی ناکا لگا کر مسافروں کی آمدورفت کو روکنے، بھتہ وصولی، گاڑیوں چھینے اور معصوم شہریوں کو اغوا کرنے کی مذموم کوشش کی۔سیکیورٹی فورسز نے اطلاع ملتے ہی فوری اور موثر کارروائی کی۔ فریقین کے درمیان شدید فائرنگ کا تبادلہ ہوا جس کے نتیجے میں بھارتی آلۂ کار بننے والے 5 دہشتگرد مارے گئے۔ فورسز نے کامیاب چھاپے کے دوران دہشتگردوں کے خفیہ ٹھکانے سے 23 مغویوں کو بحفاظت بازیاب کرا لیا ہے۔
اس کے علاوہ کارروائی کے دوران دہشتگردوں کے قبضے سے بڑی تعداد میں اسلحہ، گولہ بارود اور دھماکہ خیز مواد بھی برآمد کیا گیا ہے، جبکہ چھ ٹرک، تین بسیں اور دو کاریں بھی بازیاب کرا لی گئی ہیں جو دہشتگردوں نے قبضے میں لے رکھی تھیں۔
علاقے میں کسی بھی ممکنہ باقی ماندہ دہشتگرد کے خاتمے اور قومی شاہراہوں کے تحفظ کو یقینی بنانے کے لیے سینیٹائزیشن آپریشنز تاحال جاری ہیں۔ آئی ایس پی آر کا کہنا ہے کہ وفاقی ایپکس کمیٹی کے نیشنل ایکشن پلان کے تحت منظور شدہ "عزمِ استحکام” کے ویژن کے تحت دہشتگردی کے خلاف یہ غیر متزلزل جنگ پوری قوت کے ساتھ جاری رہے گی۔ سیکیورٹی فورسز اور قانون نافذ کرنے والے ادارے ملک سے غیر ملکی حمایت یافتہ دہشتگردی کے اس ناسور کو جڑ سے اکھاڑ پھینکنے کے لیے پرعزم ہیں۔
سیکیورٹی فورسزکی بڑی کارروائی: قلات میں ’فتنہ الہندستان‘ کے 5 دہشتگرد ہلاک، 23 مغوی بازیاب
