دوران تفتیش ملزمان کی نشاندہی پر وقوعہ میں مبینہ طور پر استعمال ہونے والا پستول بمعہ میگزین اور 2 کارتوس برآمد
دیر بالا(بیورو چیف ریاض ابوالخیل)
تھانہ گندیگار کی حدود میں واقع دیہہ عشیرئی میں کم عمر لڑکے سے مبینہ بداخلاقی اور اسلحہ کی نوک پر دھمکانے کے واقعے کی اطلاع پر گندیگار پولیس نے فوری کارروائی کرتے ہوئے مقدمہ درج کر لیا۔ڈسٹرکٹ پولیس آفیسر دیر بالا اسلم نواز نے واقعے کا سخت نوٹس لیتے ہوئے ایس ڈی پی او سرکل واڑی فخر عالم خان کی نگرانی میں انسپکٹر شیرین زادہ خان، انچارج شعبہ تفتیش، اور ایس ایچ او تھانہ گندیگار لعل بہادر خان پر مشتمل خصوصی تفتیشی ٹیم تشکیل دے کر نامزد ملزمان کی گرفتاری کے احکامات جاری کیے۔تفتیشی ٹیم نے جدید تکنیکی بنیادوں پر کارروائی کرتے ہوئے چند گھنٹوں کے اندر مقدمے میں نامزد ملزمان کاشف اور خالد شاہ، ساکنان سمکوٹ، کو گرفتار کر لیا۔پولیس نے گرفتار ملزمان کو عدالت میں پیش کرکے قانونی تحویل حاصل کر لی ہے۔ دوران تفتیش ملزمان کی نشاندہی پر وقوعہ میں مبینہ طور پر استعمال ہونے والا پستول بمعہ میگزین اور 2 کارتوس برآمد کر لیے گئے۔پولیس کی جانب سے واقعے کے اصل محرکات اور دیگر حقائق جاننے کے لیے تمام پہلوں کو مدنظر رکھتے ہوئے مزید تفتیش جاری ہے۔اس موقع پر ڈی پی او دیر بالا اسلم نواز نے کہا کہ جرائم پیشہ عناصر اور قانون شکنوں کے لیے دیر بالا میں کوئی جگہ نہیں۔ قانون کی عمل داری یقینی بنانے کے لیے بلاامتیاز اور سخت قانونی کارروائیاں جاری رہیں گی۔