نافرمان بیٹا سبحان اور داماد گفتار علی مبینہ طور پر غلط اور فحش سرگرمیوں سے منع کرنے پر مشتعل ہوگئے، فقیر عابد
ہنگورجا (رپورٹ فیاض محسن سولنگی سے)
ہنگورجا کے قریب گاؤں کینجھر منگنیجا کے رہائشی پیرسن مزدور فقیر عابد منگنیجو اپنے بیٹوں ضمیر حسین اور محب علی کے ہمراہ سٹی پریس کلب ہنگورجا پہنچے اور صحافیوں کے سامنے دہائی دیتے ہوئے الزام عائد کیا کہ ان کا نافرمان بیٹا سبحان اور داماد گفتار علی مبینہ طور پر غلط اور فحش سرگرمیوں سے منع کرنے پر مشتعل ہوگئے، جنہوں نے لاٹھیوں سے حملہ کرکے انہیں اور ان کے بیٹے ضمیر حسین کو زخمی کردیا۔
فقیر عابد منگنیجو کا کہنا تھا کہ ان کا بیٹا سبحان اور داماد گفتار علی مبینہ طور پر گاؤں کے دیگر لوگوں کو بھی مختلف طریقوں سے تنگ کرتے رہتے ہیں، جبکہ انہیں ایسے مبینہ غیر اخلاقی کاموں سے روکنے پر وہ مزید مشتعل ہوگئے۔
انہوں نے الزام عائد کیا کہ ان کا بیٹا سبحان اور داماد گفتار علی بعض بیرونی افراد کے ساتھ مل کر مبینہ طور پر منشیات کے کاروبار میں بھی ملوث ہیں۔ انہوں نے بتایا کہ وہ دونوں کو بارہا ایسے غیر قانونی کام چھوڑنے سے منع کرتے رہے، جس پر وہ مزید مشتعل ہوگئے اور مبینہ طور پر انہیں جان سے مارنے کی دھمکیاں دینے لگے۔
فقیر عابد منگنیجو نے کہا کہ وہ اپنے نافرمان بیٹے سبحان اور بیٹی کو اپنی جائیداد اور ذاتی زندگی سے بے دخل کرنے کا اعلان کرتے ہیں۔ انہوں نے خدشہ ظاہر کیا کہ مخالف فریق کی جانب سے انہیں اور ان کے خاندان کو مزید نقصان پہنچایا جاسکتا ہے۔
پیرسن فقیر عابد منگنیجو نے وزیراعلیٰ سندھ، آئی جی سندھ، ڈی آئی جی سکھر اور ایس ایس پی خیرپور سے مطالبہ کیا کہ ان کی فریاد کا فوری نوٹس لیا جائے، واقعے کی شفاف تحقیقات کرائی جائیں، انہیں اور ان کے خاندان کو تحفظ فراہم کیا جائے اور الزامات ثابت ہونے کی صورت میں ملوث افراد کے خلاف قانون کے مطابق مقدمہ درج کرکے کارروائی کی جائے۔