پشاور انورزیب خان بے نقاب نیوز۔۔
ڈپٹی کمشنر پشاور کیپٹن (ر) ثناء اللہ خان کی ہدایت پر ضلعی انتظامیہ پشاور نے شہریوں کو مضرِ صحت اور غیر معیاری قیمہ کی فراہمی کے خلاف کارروائی مزید تیز کر دی ہے۔ اس سلسلے میں ایڈیشنل اسسٹنٹ کمشنر (فقیر آباد) نے دلہ زاک روڈ پر مضرِ صحت گوشت، کیمیکل اور جانوروں کی باقیات سے قیمہ تیار کر کے فروخت کرنے والے گروہ کے خلاف کارروائی کرتے ہوئے چار افراد کو گرفتار کر لیا جبکہ مضرِ صحت گوشت اور قیمہ قبضے میں لے لیا گیا۔
ڈپٹی کمشنر پشاور کیپٹن (ر) ثناء اللہ خان نے ضلعی انتظامیہ کے افسران کو ہدایت کی ہے کہ شہریوں کی صحت سے کھیلنے والے عناصر کے خلاف بلاامتیاز کارروائیاں جاری رکھی جائیں اور مضرِ صحت گوشت و دیگر غیر معیاری اشیائے خورونوش کی تیاری اور فروخت میں ملوث افراد کے خلاف قانون کے مطابق سخت کارروائی عمل میں لائی جائے۔ڈپٹی کمشنر پشاور نے شہریوں سے بھی اپیل کی ہے کہ مضرِ صحت یا غیر معیاری گوشت اور دیگر اشیائے خورونوش کی فروخت کے حوالے سے انتظامیہ کو بروقت اطلاع دیں تاکہ ایسے عناصر کے خلاف فوری کارروائی کی جا سکے۔ ضلعی انتظامیہ پشاور نے واضح کیا ہے کہ عوام کی صحت اور جانوں کے تحفظ کے لیے مضرِ صحت اشیائے خوردونوش کی تیاری و فروخت کے خلاف کارروائیاں بلا تعطل جاری رہیں گی
