ڈسٹرکٹ خیرپور ہنگورجا: رپورٹ فیاض محسن سولنگی
گورنمنٹ بوائز مین ایلیمنٹری اسکول ہنگورجا میں ہیڈ ماسٹر امتياز حسین لغاری کی زیرِ نگرانی حضور اکرم حضرت محمد مصطفیٰ ﷺ کی جشنِ ولادتِ باسعادت کے سلسلے میں ایک روح پرور اور ایمان افروز محفلِ میلادِ مصطفیٰ ﷺ منعقد کی گئی، جس میں اسکول کے اساتذہ، طلبہ و طالبات اور مہمانوں نے بڑی تعداد میں شرکت کرکے حضور اکرم ﷺ سے اپنی عقیدت و محبت کا اظہار کیا۔
محفل کا آغاز تلاوتِ کلامِ پاک سے کیا گیا، جس کے بعد طلبہ و طالبات نے بارگاہِ رسالت ﷺ میں نعتِ رسولِ مقبول ﷺ پیش کی۔ اس موقع پر اسکول کے اساتذہ فقیر محمد سہتو، اعجاز احمد سولنگی، محمد علی سومرو اور کاشف علی میمن سمیت دیگر اساتذہ اور طلبہ نے بھرپور شرکت کی۔
تقریب میں گورنمنٹ گرلز ہائی اسکول ہنگورجا کی پرنسپل نے بھی خصوصی مہمان کی حیثیت سے شرکت کی اور اپنے خطاب میں جشنِ ولادتِ رسول ﷺ کی اہمیت، سیرتِ طیبہ اور حضور اکرم ﷺ کی تعلیمات پر روشنی ڈالی۔
اس موقع پر ہیڈ ماسٹر امتياز حسین لغاری اور استاد اعجاز احمد سولنگی نے خطاب کرتے ہوئے کہا کہ حضور اکرم ﷺ کی آمد سے انسانیت کے لیے ہدایت، رحمت اور روشنی کے دروازے کھلے، جہالت کے اندھیرے چھٹ گئے اور انسان کو امن، محبت، اخوت، بھائی چارے اور انسانیت کا درس ملا۔ انہوں نے کہا کہ سیرتِ طیبہ ہمارے لیے مشعلِ راہ ہے، جبکہ نئی نسل کو حضور اکرم ﷺ کی تعلیمات اور اسوۂ حسنہ سے روشناس کرانا وقت کی اہم ضرورت ہے۔
تقریب کے دوران طلبہ و طالبات نے نہایت جوش و عقیدت کے ساتھ نعتیں پیش کرنے کے علاوہ حضور اکرم ﷺ کی ولادتِ باسعادت، سیرتِ طیبہ اور تعلیمات کے حوالے سے پُرجوش تقاریر بھی کیں، جنہیں شرکاء نے خوب سراہا۔
محفلِ میلاد میں بہترین کارکردگی کا مظاہرہ کرنے اور پروگرام میں حصہ لینے والے طلبہ و طالبات کی حوصلہ افزائی کے لیے انہیں گولڈ میڈلز اور انعامات بھی دیے گئے۔ اس موقع پر اسکول انتظامیہ نے اس عزم کا اظہار کیا کہ طلبہ کی تعلیمی، اخلاقی اور دینی تربیت کے لیے ایسی مثبت اور بامقصد سرگرمیاں آئندہ بھی جاری رکھی جائیں گی۔
آخر میں جشنِ ولادتِ باسعادت کی خوشی میں میلاد کا لنگر بھی تقسیم کیا گیا، جبکہ ملک و قوم کی سلامتی، خوشحالی، امن و استحکام اور امتِ مسلمہ کی سربلندی کے لیے خصوصی دعائیں بھی کی گئیں۔