تل ابیب :اسرائیلی وزارتِ دفاع نے پیر کو اعلان کیا کہ یونان کے ساتھ 3اعشاریہ478 ارب ڈالر (تقریباً 3 ارب یورو) مالیت کے معاہدے پر دستخط کیے گئے ہیں، جس کے تحت یونان کے لیے ”اخیل کی ڈھال” (Achilles Shield) کے نام سے ایک فضائی دفاعی نظام تیار کیا جائے گا۔
وزارتِ دفاع نے ایک بیان میں کہا کہ معاہدے کے تحت اسرائیل، یونان کے لیے ایک جامع اور کثیر سطحی فضائی دفاعی نظام تیار کرے گا۔ یہ نظام مکمل طور پر اسرائیلی ساختہ ٹیکنالوجی اور جنگ کے دوران اسرائیلی دفاعی اداروں کی حاصل کردہ وسیع عملی مہارت پر مبنی ہوگا۔
وزارت کے مطابق یہ معاہدہ اسرائیل اور یونان کے تعلقات کی تاریخ میں دفاعی سازوسامان کی برآمد کا سب سے بڑا معاہدہ اور اسرائیل کی تاریخ کے بھی بڑے دفاعی معاہدوں میں سے ایک ہے۔
یونانی اخبار ”نافتیمبوریقی” نے باخبر ذرائع کے حوالے سے بتایا کہ طیاروں، بیلسٹک میزائلوں اور ڈرونز کے خلاف نیا نظام 35 ماہ بعد فعال ہوگا۔ اس میں ایسے مختلف ہتھیاروں کے نظام شامل ہوں گے ،جو پورے یونان میں ایک دوسرے سے جڑی ہوئی دفاعی حصار تشکیل دیں گے۔ منصوبے میں یونانی دفاعی صنعت کی شمولیت کے ساتھ ایک مربوط کمانڈ اور کنٹرول نظام بھی شامل ہوگا۔
اس سے قبل یونانی اخبار ”کاتھیمیرینی” نے بتایا تھا کہ اخیل کی ڈھال” منصوبے کی مجموعی لاگت تقریباً 3اعشاریہ5 ارب یورو ہے۔ اخبار کے مطابق منصوبے کی تیاری میں یونانی کمپنیوں کا حصہ 25 فیصد سے زیادہ، یعنی تقریباً 700 ملین یورو ہوگا۔
اسرائیل یونان کو 3اعشاریہ478 ارب ڈالر مالیت کا فضائی دفاعی نظام فراہم کرے گا،
