کراچی: چیئرمین پاکستان پیپلز پارٹی بلاول بھٹو زرداری کی منگنی یا شادی سے متعلق گردش کرنے والی خبروں کو ترجمان نے بے بنیاد اور غلط قرار دے دیا۔ تاہم غیر تصدیق شدہ خبر پر بھی پاکستانی عوام بلاول بھٹو کی شادی کی خبر پر خوش ہیں۔
بلاول بھٹو زرداری کے ترجمان مرتضیٰ وہاب نے سماجی رابطے کی ویب سائٹ ایکس پر اپنے بیان میں واضح کیا کہ چیئرمین پیپلز پارٹی کی منگنی یا شادی سے متعلق زیرِ گردش خبر میں کوئی صداقت نہیں۔
The news story regarding Chairman Bilawal Bhutto Zardari’s engagement or wedding is incorrect and unfounded
— Murtaza Wahab Siddiqui (@murtazawahab1) August 29, 2026
مرتضیٰ وہاب نے کہا کہ بلاول بھٹو زرداری کی منگنی یا شادی سے متعلق خبر غلط اور بے بنیاد ہے۔ انہوں نے واضح کیا کہ چیئرمین پیپلز پارٹی کی شادی سے متعلق سامنے آنے والی اطلاعات درست نہیں۔
ترجمان کے بیان کے بعد بلاول بھٹو زرداری کے رشتہ طے ہونے اور شادی کی تیاریوں سے متعلق گردش کرنے والی قیاس آرائیوں کی حقیقت بھی واضح ہوگئی۔ تاہم اس سے پاکستانی عوام جنہیں عرصے سے خوشی کی کوئی خبر نہیں ملی ان کی خوشیوں پر اوس پڑ گئی۔
یادرہے پاکستان پیپلز پارٹی کے چیئرمین بلاول بھٹو زرداری کے رشتہ طے ہونے اور جلد شادی کی تیاریاں شروع ہونے سے متعلق اطلاعات سامنے آئی تھیں اور ذرائع کے مطابق بلاول بھٹو کی ہونے والی دلہن کا تعلق ایک یورپی ملک سے بتایا جا رہا ہے۔ ذرائع کا دعویٰ ہے کہ رشتہ طے ہونے کے بعد خاندان کی جانب سے شادی کی تیاریوں پر غور کیا جا رہا ہے۔
دوسری جانب صدر آصف علی زرداری کے یورپ کے نجی دورے کو بھی ان اطلاعات سے جوڑا جا رہا ہے۔ صدر آصف علی زرداری 27 سے 31 اگست تک آسٹریا کے دورے پر ہیں۔