گوا / ممبئی:بالی ووڈ کے معروف اور ہر دلعزیز اداکار ارجن رامپال نے اپنے مداحوں کو حیران کرتے ہوئے اپنی دیرینہ ساتھی اور گرل فرینڈ گیبریلا ڈیمیٹریڈیس (Gabriella Demetriades) کے ساتھ گوا میں باضابطہ طور پر شادی کر لی ہے۔ اس جوڑے نے شمالی گوا کے ماپوسا میں واقع باردیز کے سب رجسٹرار کے دفتر میں اپنی شادی کا اندراج کرایا۔
پی ٹی آئی کی رپورٹ کے مطابق، جنوبی افریقہ کی شہری گیبریلا اور ارجن رامپال عام لباس میں شام کے وقت سب رجسٹرار کے دفتر پہنچے۔ باردیز کے سب رجسٹرار سورج ورنیکر نے تصدیق کی ہے کہ یہ شادی گوا کے یکساں سول کوڈ (Uniform Civil Code) کے قوانین کے تحت رجسٹر کی گئی ہے۔ ضابطے کے تحت مقامی عدالت کے اسسٹنٹ پبلک پراسیکیوٹر سے خصوصی اجازت لے کر 15 دن کی لازمی انتظار کی مدت کو معاف کرایا گیا، اور اب باضابطہ شادی کا سرٹیفکیٹ 15 دن کے بعد جوڑے کے حوالے کر دیا جائے گا۔
ارجن رامپال اور گیبریلا ڈیمیٹریڈیس سال 2018 سے ایک دوسرے کے ساتھ live in relation میں ہیں۔ شادی سے قبل اس جوڑے کے ہاں 2019 میں پہلے بیٹے ’ایرک‘ کی پیدائش ہوئی، جبکہ چار سال بعد ان کے ہاں دوسرے بیٹے ’اریو‘ نے جنم لیا۔
اس سے قبل ارجن رامپال کی پہلی شادی سابق بھارتی سپر ماڈل اور فیمینا مس انڈیا یونیورس 1986 کی فاتح مہر جیسیا سے 1998 میں ہوئی تھی، جن سے ان کی دو بیٹیاں ماہیکا اور مائرا رامپال ہیں۔ تقریباً 20 سال ساتھ رہنے کے بعد مئی 2018 میں دونوں میں علیحدگی ہو گئی تھی اور نومبر 2019 میں ان کی باضابطہ طلاق طے پا گئی تھی۔ اب ارجن رامپال نے اپنی زندگی کے اس نئے باب کا آغاز گوا میں نہایت سادگی کے ساتھ کر دیا ہے۔