قائدِ حزبِ اختلاف محمود خان اچکزئی کی زیرِ صدارت اپوزیشن کا اہم اجلاس: حکومت کے خلاف عوامی رابطہ مہم تیز کرنے کا اعلان

اسلام آباد :اپوزیشن کی مشترکہ پارلیمانی پارٹی کا اہم اجلاس پارلیمنٹ ہاؤس میں قائد حزب اختلاف قومی اسمبلی محمود خان اچکزئی کی صدارت میں منعقد ہوا جس میں ملک کی مجموعی سیاسی صورتحال، بانی پی ٹی آئی کی صحت اور آئندہ کی سیاسی حکمت عملی پر تفصیلی غور کیا گیا۔
اجلاس میں قائد حزب اختلاف سینیٹ علامہ راجا ناصر عباس، چیئرمین پی ٹی آئی بیرسٹر گوہر علی خان، سابق اسپیکر اسد قیصر، وزیراعلیٰ خیبرپختونخوا سہیل آفریدی، سلمان اکرم راجا اور دیگر اہم رہنماؤں نے شرکت کی۔
اجلاس میں بانی تحریک انصاف عمران خان کی صحت اور علاج معالجے کے حوالے سے شدید تشویش کا اظہار کرتے ہوئے واضح کیا گیا کہ ان کی صحت پر کسی قسم کا سمجھوتہ نہیں کیا جائے گا اور حکومت کی جانب سے اس معاملے پر ڈرامہ رچایا جا رہا ہے۔ اس کے علاوہ سپریم کورٹ کے احکامات پر عملدرآمد نہ ہونے کو توہین عدالت قرار دیتے ہوئے کل سپریم کورٹ سے رجوع کرنے کا فیصلہ کیا گیا۔
پارلیمانی پارٹی نے 27 ستمبر کو پی ٹی آئی کی جانب سے بھرپور احتجاج اور لانگ مارچ کی کال برقرار رکھنے کا اعلان کیا اور تمام اپوزیشن جماعتوں کو اس میں شرکت کی دعوت دینے کا فیصلہ کیا۔ اس سلسلے میں پنجاب سمیت ملک بھر میں عوامی رابطہ مہم تیز کرنے پر بھی اتفاق ہوا۔
مشترکہ اجلاس میں گرینڈ اپوزیشن الائنس کے قیام کی بھرپور تائید کی گئی اور مولانا فضل الرحمن سمیت دیگر اپوزیشن جماعتوں کی شمولیت کا خیرمقدم کیا گیا۔
اپوزیشن رہنماؤں نے آئین، جمہوریت اور قانون کی حکمرانی کے لیے اتحاد و یکجہتی کے ساتھ مشترکہ جدوجہد جاری رکھنے کا اعادہ کیا۔