سیالکوٹ:ـ سلیم احمد اعوان شیخو
ڈپٹی کمشنر سیالکوٹ اویس مشتاق کی زیرِ صدارت ضلعی امن کور کمیٹی کا اجلاس منعقد ہوا، جس میں جشنِ عید میلادالنبی ﷺ کے سلسلہ میں ضلع بھر میں منعقد ہونے والے جلوسوں، محافلِ میلاد اور دیگر مذہبی تقریبات کے انتظامی، حفاظتی اور سکیورٹی امور کا تفصیلی جائزہ لیا گیا۔
اجلاس میں کوآرڈینیٹر ضلعی امن کمیٹی حافظ اصغر علی چیمہ اور اراکینِ ضلعی امن کمیٹی نے شرکت کی۔ اس موقع پر عید میلادالنبی ﷺ کے سلسلہ میں منعقد ہونے والی تقریبات کے انتظامات، جلوسوں کے روٹس، سکیورٹی پلان، ٹریفک مینجمنٹ، صفائی ستھرائی اور دیگر ضروری امور پر تفصیلی غور کیا گیا۔
ڈپٹی کمشنر اویس مشتاق نے متعلقہ افسران کو ہدایت کی کہ عید میلادالنبی ﷺ کے جلوسوں اور محافل کے دوران صفائی ستھرائی کے خصوصی اقدامات کئے جائیں۔
انہوں نے کہا کہ جشنِ عید میلادالنبی ﷺ مذہبی عقیدت و محبت کا مظہر ہے، اس لیے تمام متعلقہ ادارے باہمی رابطے اور مؤثر کوآرڈینیشن کے ذریعے اپنی ذمہ داریاں احسن انداز میں سرانجام دیں تاکہ مذہبی تقریبات پرامن اور مثالی ماحول میں منعقد ہوں اور شہریوں کو کسی قسم کی مشکلات کا سامنا نہ کرنا پڑے۔