چوری کرنے آیا تھا یا سونے؟ نقب زن گھر میں گھس کر بستر پر سو گیا! صبح اصلی مالکان نے اٹھایا، ویڈیو وائرل

حیدرآباد: بھارت کی ریاست تلنگانہ کے رنگا ریڈی ضلع کے علاقے پہاڑی شریف میں واقع مصطفی کالونی میں چوری کی ایک ایسی انوکھی اور مزاحیہ واردات پیش آئی ہے جسے دیکھ کر پولیس بھی چکرا گئی ہے۔ گھر میں قیمتی نقدی اور زیورات چرانے کی نیت سے گھسنے والا چور خود نشے میں اتنا دھت تھا کہ وہ گھر کے اندر ہی مزے سے سو گیا اور صبح مکینوں نے اسے اٹھایا۔
رپورٹس کے مطابق ایک نامعلوم شخص رات کے وقت چوری کے ارادے سے ایک گھر میں داخل ہوا، جہاں مکین پہلے سے سو رہے تھے اور اس کی آمد سے مکمل لاعلم تھے۔ لیکن اندر پہنچ کر شاید اس پر غنودگی اس قدر طاری ہوئی کہ وہ چوری کرنے کے بجائے پرسکون نیند کی وادیوں میں اتر گیا۔

Thief Falls Asleep After Theft
A thief allegedly broke into a house in Wadi-e-Mustafa, Jalpally, Hyderabad, and stole jewellery & a mobile He reportedly fell asleep inside the same house owner found him the next morning and allegedly recovered the stolen jewellery from his pocket pic.twitter.com/kLHeNjOVyW

— Gummalla Lakshmana (@GUMMALLALAKSHM3) August 13, 2026

اس عجیب و غریب ڈرامے کا انکشاف اگلی صبح اس وقت ہوا جب گھر کے افراد بیدار ہوئے اور اپنے ہی گھر میں ایک اجنبی شخص کو خواب خرگوش میں دیکھا۔ گھبراہٹ اور حیرت کے عالم میں اہل خانہ نے فوری طور پر پڑوسیوں کو بلا لیا، جنہوں نے اس انوکھے مہمان کو گھیر کر کڑی پوچھ گچھ کی۔ اس دوران چور نے شرمندہ ہو کر اعتراف کیا کہ وہ تو یہاں مال لوٹنے آیا تھا لیکن نشے کی زیادتی کی وجہ سے وہیں ڈھیر ہو کر سو گیا۔
واقعے کی خبر پھیلتے ہی علاقہ مکینوں کی بڑی تعداد جمع ہو گئی اور اس انوکھے چور کے کارنامے پر ہنستے ہنستے سب کے پیٹ میں بل پڑ گئے۔ بعد ازاں، محلے کے لوگوں نے اس "تھکے ماندہ” چور کو پولیس کے حوالے کر دیا، جو اب تھانے میں بیٹھ کر اپنی اس حرکت پر پچھتا رہا ہوگا۔