کوئی لڑائی چاہتا ہے تو چھیڑ لے ، احتجاج کرنا جانتے ہیں ، بلاول بھٹو

کراچی :چیئرمین پاکستان پیپلزپارٹی بلاول بھٹو زرداری نے کہا ہے کہ کشمیر کے عوام کے ووٹ کا احترام کرنا ہو گا۔ ہم صبر کر رہے ہیں اور ہمارے صبر کا امتحان نہ لیا جائے۔
تقریب سے خطاب کرتے ہوئے انہوں نے کہا کہ پاکستان پیپلز پارٹی نے ہمیشہ قومی مفاد کو مقدم رکھا ہے۔ ہم حکومت کے ساتھ کھڑے ہیں تاکہ ملکی مسائل کا مقابلہ کیا جاسکے، پاکستان اور عوام کا مفاد ہمارے لیے سب سے اہم ہے۔ہم صبر کر رہے ہیں اور ہمارے صبر کا امتحان نہ لیا جائے۔ کوئی لڑائی چاہتا ہے تو لڑائی چھیڑ لے لیکن پیپلز پارٹی کے پاس تمام جمہوری اور آئینی آپشنز موجود ہیں اور ہم احتجاج کرنا بھی جانتے ہیں۔بلاول بھٹو زرداری نے کہا کہ 10 اگست کو کشمیری عوام پیپلز پارٹی کو ووٹ دینے کے ساتھ اپنے ووٹ کا تحفظ بھی کریں گے۔ کسی کو عوام کے ووٹ پر ڈاکہ ڈالنے یا مینڈیٹ پامال کرنے کی اجازت نہیں دی جاسکتی۔کشمیر کے عوام کے ووٹ سے ناانصافی ہوئی تو وہ خود ان کے ساتھ کھڑے ہوں گے اور کشمیری عوام کے حق کے لیے احتجاج بھی کریں گے۔ طاقت کا اصل سرچشمہ عوام ہیں، کشمیر کا فیصلہ کشمیری عوام ہی کریں گے۔منصفانہ انتخابات ہونے دیئے جائیں اور جس کا ووٹ نکلے، اسی کی حکومت بننے دی جائے، یہی جمہوریت کا اصول اور کشمیری عوام کا حق ہے۔