ہالی ووڈ کے معروف اداکار ٹام ہالینڈ کی نئی فلم ’سپائیڈر مین: برینڈ نیو ڈے‘ نے دنیا بھر کے باکس آفس پر تہلکہ مچا دیا ہے۔ فلم نے اپنے افتتاحی ویک اینڈ میں شاندار آغاز کرتے ہوئے دنیا بھر میں 92 کروڑ 70 لاکھ امریکی ڈالر (تقریباً 264 ارب پاکستانی روپے) کا ریکارڈ بزنس کیا ہے، جو عالمی اور شمالی امریکی باکس آفس کی تاریخ کا دوسرا سب سے بڑا افتتاحی ویک اینڈ قرار دیا جا رہا ہے۔
Spider-Man: Brand New Day was minding blowing in every way possible. 🙏🙏 pic.twitter.com/5qpTEEU6BP
— STAR (@MagicHandz) August 4, 2026
رینٹریک کے اعداد و شمار کے مطابق، اس فلم نے صرف امریکہ اور کینیڈا میں 35 کروڑ 50 لاکھ ڈالر جبکہ بین الاقوامی مارکیٹس میں 57 کروڑ 20 لاکھ ڈالر کی کمائی کی ہے۔
یہ فلم کورونا وبا کے بعد شمالی امریکہ میں سب سے بڑی اوپننگ کرنے والی فلم بن گئی ہے، جبکہ تاریخی طور پر عالمی سطح پر اس سے آگے صرف 2019 کی بلاک بسٹر فلم ’ایونجرز: اینڈ گیم‘ ہے۔ چین اس فلم کے لیے سب سے بڑی بین الاقوامی مارکیٹ ثابت ہوا جہاں اکیلے 12 کروڑ 10 لاکھ ڈالر کے ٹکٹ فروخت ہوئے۔
اس فلم میں ٹام ہالینڈ چوتھی بار پیٹر پارکر (سپائیڈر مین) کے روپ میں نظر آئے ہیں، جبکہ زینڈایا نے ان کی محبوبہ ‘ایم جے’ کا کردار ادا کیا ہے۔ فلم کی کہانی ایک ایسی دنیا کے گرد گھومتی ہے جہاں سب یہ بھول چکے ہیں کہ پیٹر پارکر کون ہے۔ اس میں تنہائی، دوستی، انسانی تعلقات اور مشکلات پر قابو پانے جیسے گہرے موضوعات کو اجاگر کیا گیا ہے، جس نے بالخصوص جنریشن زیڈ (نوجوان نسل) کے دلوں کو چھو لیا ہے۔
روٹن ٹومیٹوز پر فلم کو ناقدین کی جانب سے 90 فیصد اور ناظرین کی طرف سے 98 فیصد کی حیرت انگیز پسندیدگی ملی ہے۔ ماہرین کے مطابق اس فلم اور ’دی اوڈیسی‘ کی شاندار مشترکہ کارکردگی کی بدولت امریکی سنیما گھروں نے اپنی تاریخ کا سب سے بڑا ویک اینڈ دیکھا ہے، جس نے گرمیوں کے سیزن میں سنیما کے کاروبار کو نئی زندگی بخش دی ہے۔