لاہور:لاہور کے مختلف علاقوں میں بارش سے گرمی اورحبس کا زور ٹوٹ گیا۔
ڈیلی پاکستان کے مطابق لاہور کے علاقوں ایبٹ روڈ، شملہ پہاڑی، لکشمی چوک اور اطراف میں بارش شروع ہو گئی، گلبرگ، مسلم ٹاؤن اور سمن آباد کے علاقوں میں بارش کا سلسلہ جاری ہے۔ٹاؤن شپ، کوٹ لکھپت اور پیکو روڈ کے اطراف بارش ہوئی، جبکہ مغل پورہ، تاج پورہ، فرخ آباد اور شادی پورہ کے علاقوں میں بھی بارش ریکارڈ کی گئی۔واسا لاہور نے شہر میں ہونے والی حالیہ بارش کا تازہ ریکارڈ جاری کر دیا ہے، جس کے مطابق مختلف علاقوں میں بارش کی شدت مختلف رہی، جبکہ سب سے زیادہ 55.4 ملی میٹر بارش شادی پورہ میں ریکارڈ کی گئی۔
واسا کے مطابق ہیڈ آفس گلبرگ میں 54 ملی میٹر، مغلپورہ میں 50.6 ملی میٹر، لکشمی چوک میں 4 ملی میٹر اور جیل روڈ پر 6.2 ملی میٹر بارش ریکارڈ کی گئی۔
اعداد و شمار کے مطابق مناواں میں 43.2 ملی میٹر، جوہر ٹاؤن میں 36.4 ملی میٹر، تاجپورہ میں 34.8 ملی میٹر اور کاہنہ میں 19.2 ملی میٹر بارش ہوئی۔اسی طرح فرخ آباد میں 19.8 ملی میٹر، چوک ناخدا میں 15.6 ملی میٹر، نشتر ٹاؤن میں 12.2 ملی میٹر، سگیاں میں 9.2 ملی میٹر، اقبال ٹاؤن میں 4.4 ملی میٹر، گلشن راوی میں 3.8 ملی میٹر اور پانی والا تالاب میں 3.2 ملی میٹر بارش ریکارڈ کی گئی۔
واسا حکام کے مطابق شہر کے نشیبی علاقوں کی مسلسل نگرانی کی جا رہی ہے اور بارش کے پانی کی بروقت نکاسی کے لیے تمام متعلقہ عملہ اور مشینری فیلڈ میں موجود ہے۔
شہر میں بارش کے بعد کمشنر لاہور نعمان یوسف نے تمام متعلقہ محکموں کو نکاسی آب کے نظام کو فعال رکھنے اور شہریوں کو مشکلات سے بچانے کے لیے فوری اقدامات کی ہدایات جاری کر دی ہیں۔
کمشنر لاہور نے ہدایت کی کہ مین شاہراہوں، ذیلی سڑکوں اور نشیبی علاقوں پر خصوصی توجہ دی جائے، جبکہ واسا، میٹروپولیٹن کارپوریشن لاہور (ایم سی ایل) اور لاہور ڈویلپمنٹ اتھارٹی (ایل ڈی اے) کی فیلڈ ٹیمیں مسلسل متحرک رہیں۔