میرپورخاص (بیورو چیف قیصر راجہ راجپوت )
سندھ پنجابی اتحاد کے زیرِ اہتمام میرپورخاص میں عبدالمالک آرائیں کی میزبانی میں پنجابی برادری کے معززین کا کنونشن منعقد ہوا، جس کی صدارت سندھ پنجابی اتحاد کے سرپرست چوہدری غلام نبی آرائیں نے کی۔ کنونشن میں پنجابی برادری سے تعلق رکھنے والے معززین، سماجی و سیاسی شخصیات، نوجوانوں اور مختلف شعبہ ہائے زندگی سے وابستہ افراد نے بڑی تعداد میں شرکت کی۔
اپنے خطاب میں چوہدری نبی آرائیں نے کہا کہ پنجابی برادری کو درپیش مسائل کی ایک بڑی وجہ باہمی اتحاد کا فقدان ہے۔ اگر ہم اپنے اختلافات بھلا کر ایک دوسرے کا ساتھ دیں، محبت، بھائی چارے اور تعاون کو فروغ دیں تو کوئی بھی طاقت ہمیں کمزور نہیں کر سکتی۔ انہوں نے کہا کہ اللہ تعالیٰ بھی اسی قوم کی حالت بدلتا ہے جو خود اپنی حالت بدلنے کی کوشش کرتی ہے۔
انہوں نے کہا کہ پنجابی صرف ایک ذات کا نام نہیں بلکہ ایک زبان، ثقافت اور تہذیب کا نام ہے۔ جٹ، آرائیں، سید، مغل، راجپوت، رانا، گجر یا کسی بھی برادری سے تعلق رکھنے والا ہر وہ شخص جس کی مادری زبان پنجابی ہے، وہ ہماری برادری کا حصہ ہے۔ ہمیں ذات پات کے فرق سے بالاتر ہو کر اتحاد اور بھائی چارے کو فروغ دینا ہوگا۔
چوہدری غلام نبی آرائیں نے کہا کہ ہم پیدائشی سندھی ہیں، سندھ ہی ہماری دھرتی اور ہماری پہچان ہے۔ ہمارے آباؤ اجداد کی قبریں بھی سندھ کی سرزمین میں ہیں اور ہماری آنے والی نسلوں کا مستقبل بھی اسی دھرتی سے وابستہ ہے۔ ہم سندھ کے وفادار اور محبِ وطن شہری ہیں، اس لیے سندھ کی ترقی، امن اور خوشحالی کے لیے اپنا بھرپور کردار ادا کرنا ہم سب کی مشترکہ ذمہ داری ہے۔
انہوں نے مزید کہا کہ ہمیں ایک دوسرے کی مدد کرنی چاہیے، اپنوں کی چھوٹی موٹی غلطیوں کو درگزر کرنا چاہیے اور دلوں میں نفرت کے بجائے محبت پیدا کرنی چاہیے۔ انہوں نے کہا کہ جب کوئی ہمیں نقصان پہنچاتا ہے تو وہ ہماری ذات یا قبیلے کو نہیں دیکھتا، اس لیے ہمیں بھی ذاتی اور برادری کے اختلافات ختم کرکے ایک مضبوط قوم بننا ہوگا۔
انہوں نے شرکاء پر زور دیا کہ وہ اپنی زبان، ثقافت اور روایات کو زندہ رکھیں، نوجوان نسل کو اپنی شناخت سے جوڑیں اور سندھ میں رہنے والی تمام برادریوں کے ساتھ محبت، رواداری اور باہمی احترام کے رشتے کو مزید مضبوط بنائیں۔
کنونشن کے اختتام پر پنجابی برادری کے اتحاد، سندھ کی ترقی، پاکستان کی سلامتی اور خوشحالی کے لیے خصوصی دعا کی گئی، جبکہ شرکاء نے سندھ پنجابی اتحاد کے پلیٹ فارم کو مزید مضبوط بنانے کے عزم کا اظہار بھی کیا۔