سبزی منڈی کے شیڈ کی توسیع کا کام ایک مرتبہ پھر شروع

بلوچستان رحمت اللہ بلوچ بیوروچیف بے نقاب نیوز)

پنجگور چتکان بازار میں سبزی منڈی کے شیڈ کی توسیع کا کام ایک مرتبہ پھر شروع کر دیا گیا ہے۔ نئے شیڈ کے بننے سے دھوپ اور بارش میں کھلے آسمان تلے بیٹھے سبزی فروشوں اور دیگر دکانداروں میں خوشی کی لہر دوڑ گئی ہے۔
یہ منصوبہ میئر پنجگور شکیل احمد قمبرانی کے خصوصی فنڈ سے شروع کیا گیا ہے۔ پچھلے سال سبزی منڈی کے لیے منظور شدہ شیلٹر کا کام اب دوبارہ تیزی سے جاری ہے۔ نئے شیڈ کی تکمیل کے بعد مارکیٹ کی خوبصورتی میں اضافہ ہوگا اور سبزی فروش و دیگر دکاندار بارش اور شدید دھوپ سے محفوظ ہو کر اپنا کاروبار کر سکیں گے۔
چتکان بازار کے صدر فرید احمد اور دکانداروں نے مئیر پنجگور شکیل احمد قمبرانی کی اس کارکردگی پر دلی اظہارِ تشکر کیا اور کہا کہ اس اقدام سے ہمیں بہت ریلیف ملے گا۔تاجروں نے اس موقع پر یہ درخواست بھی کی کہ بازار کے دیگر مسائل کی جانب بھی توجہ دی جائے۔ انہوں نے کہا کہ چتکان بازار میں سیوریج لائن کی مرمت اور صفائی و ستھرائی کے کام کو بھی جاری رکھا جائے تاکہ شہریوں کو صحت مند اور صاف ماحول میسر آ سکے۔
علاقہ مکینوں کا کہنا ہے کہ اگر شیڈ کے ساتھ سیوریج اور صفائی کے نظام کو بھی بہتر بنایا جائے تو چتکان بازار پنجگور کی ایک ماڈل مارکیٹ بن سکتی ہے۔