کیا سوشل میڈیا ایکٹوسٹ ڈاکٹر نبیہہ علی خان کی شادی کا باب ہمیشہ کے لیے بند ہو گیا؟

لاہور:معروف سوشل میڈیا ایکٹوسٹ ڈاکٹر نبیہہ علی خان کی جانب سے فیملی کورٹ میں شدید نوعیت کے الزامات کے ساتھ خلع کا دعویٰ دائر کیے جانے کے بعد ان کے شوہر حارث حامد کھوکھر نے باقاعدہ طلاق نامہ جاری کرتے ہوئے طلاقِ اول دے دی ہے۔
رپورٹس کے مطابق، ڈاکٹر نبیہہ علی خان نے اپنے شوہر کے ساتھ مزید رشتہ ازدواج برقرار رکھنے سے معذرت کرتے ہوئے لاہور کی فیملی کورٹ سے رجوع کیا تھا۔ دائر کردہ خلع کی درخواست میں ڈاکٹر نبیہہ نے شوہر پر انتہائی سنگین الزامات عائد کرتے ہوئے مؤقف اختیار کیا تھا کہ حارث کھوکھر ان کے ساتھ انتہائی نامناسب اور غیر انسانی رویہ رکھتے ہیں، انہیں مبینہ طور پر شدید بدسلوکی کا نشانہ بنایا جاتا ہے اور ان کے ساتھ جانوروں جیسا برتاؤ کیا جاتا ہے۔
درخواست میں مزید یہ بھی الزام لگایا گیا کہ شوہر نہ صرف جسمانی تشدد میں ملوث ہیں بلکہ وہ اچھے کردار کے حامل بھی نہیں ہیں۔ ڈاکٹر نبیہہ نے عدالت سے استدعا کی تھی کہ ان نامساعد اور گھٹن زدہ حالات میں ازدواجی تعلق کو مزید آگے بڑھانا ناممکن ہو چکا ہے، اس لیے عدالت خلع کی ڈگری جاری کرے۔ عدالتی کارروائی اور سنگین الزامات کے سامنے آنے کے فورا بعد شوہر حارث کھوکھر کی جانب سے طلاق نامہ جاری کیے جانے کی اطلاعات موصول ہوئی ہیں۔