ڈیرہ اسماعیل خان: رقابت کا شاخسانہ ،ٹک ٹاکر حارث گلی پر فائرنگ، ایک شخص جاں بحق، دو زخمی

ڈیرہ اسماعیل خان: ڈیرہ اسماعیل خان کے بنوں روڈ پر واقع ایک ہوٹل میں نامعلوم وجوہات کی بنا پر ہونے والی فائرنگ کے نتیجے میں ایک شخص جاں بحق جبکہ معروف ٹک ٹاکر حارث گلی سمیت دو افراد شدید زخمی ہوگئے ہیں۔
پولیس کے مطابق یہ افسوسناک واقعہ صدر تھانے کے قریب واقع ‘کوئٹہ کیفے’ میں پیش آیا۔ فائرنگ کے نتیجے میں ہوٹل میں کام کرنے والا ایک مزدور موقع پر ہی دم توڑ گیا، جبکہ ٹک ٹاکر حارث گلی کو متعدد گولیاں لگیں جس سے وہ شدید زخمی ہوگئے۔ انہیں فوری طور پر تشویشناک حالت میں مقامی ہسپتال منتقل کر دیا گیا ہے جہاں ان کا علاج جاری ہے۔ واقعے میں ایک اور شخص کے بھی زخمی ہونے کی اطلاعات ہیں۔
پولیس نے کارروائی کرتے ہوئے واقعے میں ملوث ملزم کی شناخت کر لی ہے۔ ابتدائی تحقیقات کے مطابق ملزم کا نام احسان اللہ کنڈی ہے، جو سابق امن کمیٹی کا رکن بتایا جاتا ہے اور مبینہ طور پر حارث گلی کا ساتھی بھی رہا ہے۔
پولیس حکام کا کہنا ہے کہ ابتدائی تفتیش میں اس واقعے کا تعلق مبینہ طور پر ‘عشق و محبت کے تنازع’ سے جوڑا جا رہا ہے، تاہم پولیس ابھی کسی حتمی نتیجے پر پہنچنے کے بجائے معاملے کے تمام پہلوؤں کا باریک بینی سے جائزہ لے رہی ہے۔ پولیس کا کہنا ہے کہ جلد ہی واقعے کی اصل وجوہات اور مکمل حقائق عوام کے سامنے لائے جائیں گے۔