لاہور: سانحہ کاہنہ کے المناک واقعے کے بعد وزیراعلیٰ پنجاب مریم نواز شریف نے سوگوار خاندانوں کے گھر جا کر ان سے دلی تعزیت کی اور ان کے دکھ میں برابر کی شرکت کی۔
وزیراعلیٰ پنجاب مریم نواز شریف نے کاہنہ میں جاں بحق ہونے والے بچوں کے والدین سے ملاقات کی، غم سے نڈھال ماؤں کو گلے لگایا اور انہیں حوصلہ دیا۔ اس موقع پر وزیراعلیٰ کا کہنا تھا کہ "ننھے پھولوں کا اس طرح بچھڑ جانا دلخراش ہے، ان کے آنسوؤں کا مداوا کوئی رقم نہیں کر سکتی، مگر دکھ کی اس گھڑی میں ہم متاثرہ خاندانوں کو تنہا نہیں چھوڑیں گے۔”
مریم نواز شریف نے متاثرین کے زخموں پر مرہم رکھتے ہوئے سوگوار خاندانوں کو یقین دلایا کہ حکومتِ پنجاب ان کے ساتھ مکمل اظہارِ یکجہتی کرتی ہے اور ہر ممکن تعاون فراہم کیا جائے گا۔
حکومتِ پنجاب کی جانب سے متاثرہ خاندانوں کی داد رسی کے لیے خصوصی مالی امداد کا اعلان کیا گیا ہے، جس کے تحت سانحہ کاہنہ میں جاں بحق ہونے والے ہر بچے کے لواحقین کو 20 لاکھ روپے جبکہ زخمی ہونے والے بچوں کے لیے 5 لاکھ روپے کی مالی امداد فراہم کی جائے گی۔ وزیراعلیٰ نے متاثرہ خاندانوں کو چیکس بھی سپرد کیے۔
اس کے علاوہ وزیراعلیٰ نے متعلقہ حکام کو زخمی بچوں کی بہترین طبی دیکھ بھال اور علاج معالجے کے لیے خصوصی ہدایات جاری کیں تاکہ ان کی جلد صحت یابی کو یقینی بنایا جا سکے۔