سعودی عرب کا پاکستان کے ساتھ سٹریٹجک سکیورٹی معاہدہ، وزیر داخلہ محسن نقوی کی اہم کامیابی

ریاض (رپورٹ: نیوز ڈیسک) پاکستان اور سعودی عرب نے اپنے دیرینہ برادرانہ تعلقات کو مزید وسعت دیتے ہوئے سکیورٹی کے شعبے میں باہمی تعاون کو فروغ دینے کے لیے مفاہمت کی یادداشت (ایم او یو) پر دستخط کر دیے ہیں۔ یہ دستخط سعودی وزیرِ داخلہ عبدالعزیز بن سعود بن نائف اور پاکستان کے وزیرِ داخلہ محسن نقوی کے درمیان ریاض میں ہونے والی ملاقات میں کیے گئے۔
ملاقات کے بعد جاری کیے گئے بیان میں سعودی وزیرِ داخلہ عبدالعزیز بن سعود بن نائف نے کہا کہ اس معاہدے کا مقصد دونوں ممالک کے درمیان سکیورٹی تعاون کو مضبوط بنانا ہے۔ انہوں نے اسے پاکستان اور سعودی عرب کے درمیان سٹریٹجک شراکت داری اور دیرینہ تعلقات کا منہ بولتا ثبوت قرار دیا۔ سعودی وزیرِ داخلہ نے اس عزم کا اعادہ کیا کہ دونوں ملک مل کر خطے میں سکیورٹی چیلنجز سے نمٹنے کے لیے مشترکہ کوششیں جاری رکھیں گے۔
اپنے دورہ ریاض کے دوران، پاکستانی وزیرِ داخلہ محسن نقوی نے ریاض ریجن میں قائم ‘متحدہ سکیورٹی آپریشنز سینٹر 911’ کا دورہ بھی کیا۔ اس موقع پر انہیں سینٹر کے کام کرنے کے طریقہ کار اور جدید ٹیکنالوجی کے استعمال کے بارے میں تفصیلی بریفنگ دی گئی۔ انہوں نے سعودی سکیورٹی سسٹم کے جدید انفراسٹرکچر اور آپریشنل صلاحیتوں کو سراہا۔
اس مفاہمتی یادداشت کے ذریعے دونوں ممالک کے درمیان انسدادِ دہشت گردی، انٹیلیجنس شیئرنگ اور سکیورٹی کے شعبے میں جدید تربیت کے تبادلے کو ایک نئی سمت ملنے کی توقع ہے۔