انورزیب خان پشاور۔
وزیر اطلاعات و تعلقاتِ عامہ خیبر پختونخوا، شفیع جان نے آج سنٹرل جیل پشاور کا دورہ کیا، جہاں ان کا استقبال جناب بیت اللہ خان، ڈی آئی جی ریجنل پرزن آفس پشاور، اور جناب محمد وسیم خان، سپرنٹنڈنٹ سنٹرل جیل پشاور نے کیا۔دورے کے دوران محترم وزیر اطلاعات نے ڈرگ ری ہیبیلیٹیشن سینٹر، کک ہاؤس، جیل انڈسٹریز، نو قائم شدہ میڈیکل وارڈ، جیل لائبریری اور ای وزٹ سہولت کا معائنہ کیا۔ انہیں قیدیوں کی فلاح و بہبود، صحت، فنی تربیت اور بحالی سے متعلق جاری مختلف اقدامات اور پروگراموں پر تفصیلی بریفنگ دی گئی۔ وزیر اطلاعات و تعلقاتِ عامہ نے خیبر پختونخوا کے انسپکٹر جنرل جیل خانہ جات، جناب ریحان گل خٹک کی قیادت میں جاری مختلف اصلاحی، فلاحی اور بحالی پروگراموں کا بھی جائزہ لیا اور قیدیوں کی بحالی، ہنرمندی کے فروغ اور انہیں معاشرے کا مفید شہری بنانے کے لیے محکمہ جیل خانہ جات کی کاوشوں کو سراہا۔