بلوچستان رحمت اللہ بلوچ بیوروچیف بے نقاب نیوز)
موسیٰ خیل میں مسلح افراد کی فائرنگ، صحافی لالا اسرافیل جاں بحق موسیٰ خیل شہر میں نامعلوم مسلح افراد کی فائرنگ کے نتیجے میں مقامی صحافی لالا اسرافیل جاں بحق ہو گئے۔ یہ واقعہ شہر کے علاقے ڈاکٹر گلی میں پیش آیا، جہاں مسلح افراد نے فائرنگ کر کے انہیں نشانہ بنایا۔ عینی شاہدین کے مطابق فائرنگ کے بعد ملزمان موقع سے فرار ہونے میں کامیاب ہو گئے۔اطلاع ملتے ہی پولیس اور قانون نافذ کرنے والے اداروں کے اہلکار موقع پر پہنچ گئے اور علاقے کو گھیرے میں لے کر شواہد اکٹھے کرنا شروع کر دیے۔ پولیس کے مطابق مقتول کی لاش کو ضروری کارروائی کے لیے اسپتال منتقل کر دیا گیا ہے، جبکہ واقعے کی مختلف پہلوؤں سے تحقیقات شروع کر دی گئی ہیں۔
ابتدائی طور پر قتل کی وجوہات سامنے نہیں آسکی ہیں، تاہم پولیس کا کہنا ہے کہ ملزمان کی گرفتاری کے لیے کوششیں جاری ہیں۔ دوسری جانب صحافی برادری اور مختلف سماجی حلقوں نے واقعے کی شدید مذمت کرتے ہوئے قاتلوں کی فوری گرفتاری اور واقعے کی شفاف تحقیقات کا مطالبہ کیا ہے۔ اس بہیمانہ واقعے کے بعد علاقے میں تشویش کی لہر دوڑ گئی ہے اور مقامی افراد نے صحافیوں کے تحفظ کو یقینی بنانے پر زور دیا ہے۔