"پاکستان اور چین تعلقات کو مزید وسعت دینے کے لیے پرعزم: چینی قونصل جنرل سن یان کی ملک محمد احمد خاں سے ملاقات”

لاہور:سپیکر پنجاب اسمبلی ملک محمد احمد خاں سے لاہور میں تعینات چین کے قونصل جنرل سن یان نے اسمبلی چیمبر میں ملاقات کی۔ ملاقات میں پاک چین دوطرفہ تعلقات، معاشی تعاون، سی پیک اور پارلیمانی سفارت کاری سمیت باہمی دلچسپی کے امور پر تفصیلی تبادلہ خیال کیا گیا۔
سپیکر پنجاب اسمبلی ملک محمد احمد خاں نے گفتگو کرتے ہوئے کہا کہ وزیراعظم شہباز شریف کا حالیہ دورۂ چین پاک چین تعلقات میں ایک اہم سنگِ میل ثابت ہوا ہے۔ انہوں نے کہا کہ چینی قیادت کے ساتھ ہونے والی ملاقاتیں انتہائی مفید، بامقصد اور نتیجہ خیز رہیں، اور اب دورۂ چین کے دوران طے پانے والے فیصلوں پر بروقت عملدرآمد ناگزیر ہے۔
ملک محمد احمد خاں کا کہنا تھا کہ پاک چین سٹریٹجک شراکت داری دونوں ممالک کے مشترکہ مستقبل کی ضمانت ہے، اور سی پیک پاکستان کی اقتصادی ترقی کے نئے دور کا آغاز ثابت ہوگا۔ انہوں نے زور دیا کہ خصوصی اقتصادی زونز میں چینی سرمایہ کاری سے روزگار اور صنعتی ترقی کے نئے مواقع پیدا ہوں گے، اور اس معاشی تعاون کے ثمرات براہِ راست عوام تک پہنچنے چاہئیں۔ انہوں نے مزید کہا کہ وزیراعظم کی قیادت میں پاک چین معاشی تعاون نئی بلندیوں کی جانب گامزن ہے اور چین پاکستان کی ترقی و خوشحالی کا قابلِ اعتماد شراکت دار ہے۔
سپیکر پنجاب اسمبلی نے کہا کہ پارلیمانی سفارت کاری دونوں ممالک کے مابین دیرینہ برادرانہ تعلقات، باہمی اعتماد اور تعاون کے فروغ میں مؤثر کردار ادا کرے گی۔ انہوں نے پاک چین دوستی کو آزمودہ اور فولادی رشتہ قرار دیا۔
اس موقع پر چینی قونصل جنرل سن یان نے کہا کہ چین پاکستان کے ساتھ دوطرفہ تعلقات کو مزید وسعت دینے کے لیے پرعزم ہے۔ انہوں نے اس بات پر اتفاق کیا کہ دونوں ممالک کے درمیان مختلف شعبوں میں تعاون کو مزید بڑھایا جائے گا، جبکہ تعلیمی اور ثقافتی روابط کے فروغ سے دونوں ممالک کے عوام مزید قریب آئیں گے۔
ملاقات میں سیکرٹری جنرل پنجاب اسمبلی چوہدری عامر حبیب، ایڈوائزر ٹو سپیکر اسامہ خاور، پرنسپل سیکرٹری عماد حسین بھلی، ملک تیمور احمد خاں اور ڈائریکٹر میڈیا راؤ ماجد علی بھی موجود تھے۔