سکھر ( رپورٹ/عبد الرحمان راجپوت )
بارشوں کے دوران نکاسی آب کے نظام کو فعال رکھنے کے لیے ضلعی انتظامیہ متحرک، اسسٹنٹ کمشنرز کے مختلف پمپنگ اسٹیشنز کے اچانک دورے۔ڈپٹی کمشنر سکھر نادر شہزاد خان کی خصوصی ہدایات پر اسسٹنٹ کمشنر سکھر سٹی سارہ فراز اور اسسٹنٹ کمشنر نیو سکھر بشریٰ منصور نے ضلع میں جاری بارشوں کے پیشِ نظر تعلقہ سکھر سٹی اور تعلقہ نیو سکھر کے مختلف ڈسپوزل اور پمپنگ اسٹیشنز کا اچانک دورہ کیا اور نکاسی آب کے انتظامات کا تفصیلی جائزہ لیا۔دورے کے دوران دونوں افسران نے پمپنگ اسٹیشنز میں نصب مشینری کی آپریشنل حالت، پمپس کی تعداد، فیول کی دستیابی، اسٹینڈ بائی جنریٹرز کی فعالیت، عملے کی حاضری اور ڈیوٹی روسٹر کا باریک بینی سے معائنہ کیا۔ انہوں نے متعلقہ افسران اور اسٹیشن انچارجز سے بارش کے دوران ہنگامی صورتحال سے نمٹنے کے لیے کیے گئے انتظامات کے بارے میں بھی تفصیلی بریفنگ حاصل کی۔