شیخوپورہ (رپورٹ اسامہ طفیل)
شیخوپورہ میں سی سی ڈی پولیس اور مبینہ مسلح ملزمان کے درمیان فائرنگ کا واقعہ پیش آیا۔ پولیس کے مطابق لاگر روڈ سیمنٹ نالہ کے قریب ناکہ بندی کے دوران تین مشکوک افراد موٹرسائیکل پر سوار ہو کر آئے جنہیں رکنے کا اشارہ کیا گیا۔پولیس کا کہنا ہے کہ ملزمان نے رکنے کے بجائے جدید اسلحہ سے فائرنگ شروع کر دی۔ ملزمان کی فائرنگ سے سرکاری گاڑی کو نقصان پہنچا جبکہ ایک گولی گاڑی کے ٹائر پر لگنے سے ٹائر پھٹ گیا۔پولیس کے مطابق فائرنگ کے دوران ایک کانسٹیبل کی چھاتی پر بھی گولی لگی تاہم بلٹ پروف جیکٹ پہننے کی وجہ سے وہ محفوظ رہا۔ پولیس نے حقِ حفاظتِ خود اختیاری کے تحت جوابی فائرنگ کی۔ایف آئی آر کے مطابق فائرنگ کے دوران ملزمان کا ایک ساتھی اپنے ہی ساتھیوں کی گولی لگنے سے زخمی ہو کر گر گیا جبکہ دو ملزمان موقع سے فرار ہونے میں کامیاب ہو گئے۔پولیس کا کہنا ہے کہ زخمی ملزم نے اپنی شناخت زبیر ولد عنایت سکنہ کوٹلہ پنجو بیگ کے نام سے کروائی اور دورانِ تفتیش اپنے ایک ساتھی کا نام فیاض عرف ساجو بتایا۔ تاہم زخموں کی تاب نہ لاتے ہوئے ملزم موقع پر ہی دم توڑ گیا۔واقعہ کی اطلاع اعلیٰ حکام کو دے دی گئی جبکہ نعش کو پوسٹ مارٹم کے لیے ڈی ایچ کیو ہسپتال منتقل کر دیا گیا ہے۔ پولیس نے مقدمہ درج کر کے فرار ملزمان کی تلاش شروع کر دی ہے۔