لاہور:شہر کے مختلف علاقوں میں تیزبارش شروع ہوگئی .نشیبی علاقوں میں پانی کھڑا ہوگیا واسا کاعملہ پانی کے نکاس کے لئے متحرک ٹیموں نے امدادی کارروائیوں کا آغاز کردیا ۔
شدید گرمی سے نڈھال شہریوں کیلئے موسم خوشگوار ہو گیا ہے۔ لاہور کے آسمان پر کالی گھٹائیں چھا گئی ہیں جبکہ شہر کے مختلف علاقوں میں تیز بارش کا سلسلہ جاری ہے۔
سٹی فورٹی ٹو کی رپورٹ کے مطابق فیروز پور روڈ، کلمہ چوک، نصیر آباد، ماڈل ٹاؤن، ہربنس پورہ اور گرد و نواح کے علاقوں میں موسلادھار بارش ہو رہی ہے۔ بارش کے باعث درجہ حرارت میں کمی آئی اور موجودہ درجہ حرارت 29 ڈگری سینٹی گریڈ ریکارڈ کیا گیا۔محکمہ موسمیات کے مطابق لاہور میں زیادہ سے زیادہ درجہ حرارت 34 ڈگری سینٹی گریڈ جبکہ کم سے کم درجہ حرارت 26 ڈگری سینٹی گریڈ رہنے کا امکان ہے۔ شہر میں ہوا میں نمی کا تناسب 48 فیصد ریکارڈ کیا گیا جبکہ 19 کلو میٹر فی گھنٹہ کی رفتار سے ہوائیں چلتی رہیں۔
محکمہ موسمیات نے پیشگوئی کی ہے کہ آئندہ ہفتے کے دوران بھی وقفے وقفے سے بارشوں کا امکان موجود ہے، جس سے موسم مزید خوشگوار رہنے کی توقع ہے۔
کراچی میں آج بھی شدید گرمی برقرار رہی۔ صبح سویرے ہی 36 ڈگری سینٹی گریڈ جیسی گرمی محسوس کی گئی جبکہ موجودہ درجہ حرارت 31 ڈگری سینٹی گریڈ ریکارڈ کیا گیا۔ محکمہ موسمیات کے مطابق شہر قائد میں آج درجہ حرارت 38 ڈگری سینٹی گریڈ تک پہنچ سکتا ہے۔
ادھر اسلام آباد میں دن کے اوقات میں موسم گرم اور خشک رہنے کا امکان ہے جبکہ درجہ حرارت 40 ڈگری سینٹی گریڈ تک جا سکتا ہے۔ تاہم شام کے وقت آندھی اور ہلکی بارش کی پیشگوئی بھی کی گئی ہے۔محکمہ موسمیات کے مطابق شام اور رات کے اوقات میں کشمیر، گلگت بلتستان اور خیبر پختونخوا کے مختلف علاقوں میں بھی بارش کا امکان موجود ہے، جس سے گرمی کی شدت میں کمی متوقع ہے۔
