شہر کے 23 وارڈز میں صفائی ستھرائی چونے کا چھڑکاؤ اور جراثیم کش اسپرے

ٹنڈوالہیار (رپورٹ تیمور رضا قائم خانی) میونسپل کمیٹی کے چیئرمین سید ثمر حسن شاہ رضوی کی خصوصی ہدایات پر عیدالاضحیٰ کے موقع پر ٹنڈوالہیار شہر کے 23 وارڈز میں صفائی ستھرائی اور قربانی کی آلائشوں کو بروقت اٹھانے کے لیے جامع اور مؤثر حکمت عملی مرتب کی گئی۔ اس سلسلے میں میونسپل کمیٹی کی خصوصی ٹیمیں مختلف علاقوں میں تعینات کی گئیں، جنہوں نے عید کے تینوں دن مسلسل کام کرتے ہوئے آلائشوں کو فوری طور پر اٹھا کر مقررہ مقامات پر ٹھکانے لگایا، جبکہ چونے کا چھڑکاؤ اور جراثیم کش اسپرے بھی کیا گیا تاکہ شہریوں کو صاف ستھرا اور صحت مند ماحول فراہم کیا جاسکے۔شہر کے مختلف علاقوں کے مکینوں نے میونسپل کمیٹی کی کارکردگی کو سراہتے ہوئے کہا کہ اس مرتبہ صفائی کے انتظامات ماضی کے مقابلے میں زیادہ بہتر، منظم اور بروقت تھے۔ شہریوں کا کہنا تھا کہ عموماً عیدالاضحیٰ کے موقع پر آلائشوں کی بروقت صفائی نہ ہونے کے باعث تعفن اور گندگی پھیل جاتی ہے، تاہم اس بار چیئرمین میونسپل کمیٹی سید ثمر حسن شاہ رضوی کی ذاتی دلچسپی اور نگرانی کے باعث ہر علاقے میں صفائی کے عمل کو یقینی بنایا گیا۔شہریوں نے کہا کہ میونسپل کمیٹی کے ملازمین نہ صرف بروقت علاقوں میں پہنچے بلکہ انہوں نے انتہائی ذمہ داری اور محنت کے ساتھ اپنے فرائض انجام دیے۔ شہر کے گلی محلوں، شاہراہوں اور رہائشی علاقوں میں مسلسل صفائی کے باعث ماحول خوشگوار رہا اور شہریوں کو کسی قسم کی پریشانی کا سامنا نہیں کرنا پڑا۔ شہریوں نے امید ظاہر کی کہ آئندہ بھی اسی جذبے اور ذمہ داری کے ساتھ عوامی خدمت کا سلسلہ جاری رکھا جائے گا۔رابطہ کرنے پر میونسپل کمیٹی کے چیئرمین سید ثمر حسن شاہ رضوی نے کہا کہ عوام کو صاف ستھرا ماحول فراہم کرنا ہماری اولین ترجیح ہے ۔