مخدوم سعید الزمان عاطف اور سینئر سیاستدان محمد خان جونیجو کے درمیان اہم ملاقات

حیدرآباد( رپورٹ :دلدار علی بلال)
سروری تنظیم کے بانی چیئرمین اور سندھ ادبی بورڈ کے چیئرمین مخدوم سعید الزمان عاطف اور سینئر سیاستدان محمد خان جونیجو کے درمیان اہم ملاقات ہوئی، جس میں سندھ کی موجودہ سیاسی صورتحال، عوامی مسائل، بلدیاتی نظام اور آئندہ بلدیاتی انتخابات سے متعلق تفصیلی تبادلہ خیال کیا گیا۔
ملاقات کے دوران دونوں رہنماؤں نے اس بات پر زور دیا کہ عوام کو بنیادی سہولیات کی فراہمی کے لیے مضبوط اور بااختیار بلدیاتی نظام ناگزیر ہے۔ انہوں نے کہا کہ صاف پانی، صحت، تعلیم اور سڑکوں جیسے بنیادی مسائل کے حل کے لیے مقامی اداروں کو فعال اور مستحکم بنانا وقت کی اہم ضرورت ہے تاکہ عوام کے مسائل ان کی دہلیز پر حل ہو سکیں۔
اس موقع پر مخدوم سعید الزمان عاطف نے کہا کہ سندھ کے عوام ہمیشہ امن، بھائی چارے اور ترقی پسند سوچ کے حامی رہے ہیں، اس لیے سیاسی قوتوں کو ذاتی مفادات کے بجائے عوامی خدمت کو ترجیح دینی چاہیے۔ انہوں نے کہا کہ نوجوانوں کو مثبت سیاست کی جانب راغب کرنا وقت کی اہم ضرورت ہے تاکہ سندھ اور ملک کے بہتر مستقبل کو یقینی بنایا جا سکے۔