کوئٹہ :وزیر اعلیٰ بلوچستان کے معاون برائے سیاسی و میڈیا امور شاہد رند نے بتایا ہے کہ بلوچستان کے علاقے منگلہ زرغون غر میں سیکیورٹی فورسز کے 13 مئی سے جاری انٹیلی جنس بیسڈ آپریشن کے دوران فتنہ الہندوستان سے تعلق رکھنے والے 35 سے زائد عسکریت پسند مارے گئے۔
وزیراعلیٰ بلوچستان کے معاون شاہد رند نے اس صورت حال پر بتایا ہے کہ آپریشن کے دوران دہشت گردوں کے متعدد کیمپس اور ٹھکانے بھی تباہ کیے گئے، جس سے ان کے نیٹ ورک کو شدید نقصان پہنچا ہے۔کارروائی کے دوران فتنہ الہندوستان کے 3 اہم کمانڈرز کو گرفتار بھی کیا گیا ہے، جن سے اہم معلومات حاصل ہوئی ہیں، ان معلومات کی بنیاد پر مزید کارروائیاں جاری ہیں۔دہشت گرد تنظیم کے سہولت کاروں اور پشت پناہ عناصر کے خلاف بھی گھیرا تنگ کیا جا رہا ہے اور ریاست پاکستان دہشت گردی کے مکمل خاتمے تک اپنی کارروائیاں جاری رکھے گی۔
انہوں نے اس آپریشن کو بلوچستان اور ملک کے امن و استحکام کے لیے ناگزیر قرار دیتے ہوئے عوام سے اپیل کی کہ وہ سiکیورٹی فورسز کے ساتھ مکمل تعاون کریں اور مشکوک عناصر کی نشاندہی کریں۔
انہوں نے اس عزم کا اعادہ کیا کہ دہشت گردوں اور ان کے بیرونی آقاؤں کے مذموم عزائم کو ہر صورت ناکام بنایا جائے گا۔