گوادر یونیورسٹی کے وائس چانسلر اور پرو وائس چانسلر لاپتہ، سیکیورٹی ادارے متحرک

بلوچستان (رحمت اللہ بلوچ، بیوروچیف بے نقاب) یونیورسٹی آف گوادر کے وائس چانسلر اور پرو وائس چانسلر گزشتہ روز گوادر سے کوئٹہ جاتے ہوئے مستونگ کے قریب لاپتہ ہوگئے، جس کے بعد صوبائی حکومت اور سیکیورٹی اداروں نے معاملے کی تحقیقات اور بازیابی کی کوششیں تیز کر دی ہیں۔ معاونِ خصوصی برائے داخلہ حکومت بلوچستان بابر یوسفزئی کے مطابق دونوں اعلیٰ تعلیمی افسران کا گوادر سے کوئٹہ سفر کے دوران مستونگ کے قریب رابطہ منقطع ہوا۔ ان کا کہنا تھا کہ دونوں کے موبائل فونز بند ہیں جبکہ سیکیورٹی ادارے جدید ٹریسنگ سسٹم کے ذریعے ان کی لوکیشن معلوم کرنے میں مصروف ہیں۔حکام کے مطابق ضلعی انتظامیہ، قانون نافذ کرنے والے ادارے اور دیگر متعلقہ سیکیورٹی ایجنسیاں مشترکہ طور پر سرچ اور ریسکیو آپریشن جاری رکھے ہوئے ہیں۔ معاملے کے تمام پہلوؤں کا جائزہ لیا جا رہا ہے جبکہ ممکنہ شواہد اور سفری روٹس کی بھی جانچ کی جا رہی ہے۔ حکومت بلوچستان نے واقعے کو انتہائی سنجیدہ قرار دیتے ہوئے کہا ہے کہ دونوں افسران کی محفوظ بازیابی کے لیے تمام دستیاب وسائل بروئے کار لائے جا رہے ہیں۔ دوسری جانب تعلیمی حلقوں اور شہری تنظیموں نے واقعے پر تشویش کا اظہار کرتے ہوئے فوری اور مؤثر کارروائی کا مطالبہ کیا ہے۔