نواب شاہ (رپورٹ: نفیس آرائیں) دوڑ شہر میں غیر اعلانیہ اور طویل دورانیے کی لوڈشیڈنگ کے خلاف ٹاؤن کمیٹی دوڑ اور واپڈا حکام کے درمیان جاری کشیدگی اُس وقت شدت اختیار کر گئی جب ٹاؤن کمیٹی انتظامیہ نے واپڈا دفتر کے باہر منفرد انداز میں احتجاج ریکارڈ کرایا۔ذرائع کے مطابق چند روز قبل شہر میں زیرو لوڈشیڈنگ کے حوالے سے طے پانے والے معاہدے پر ابتدائی طور پر محدود مدت تک عملدرآمد کیا گیا، تاہم بعد ازاں واپڈا حکام کی جانب سے دوبارہ غیر اعلانیہ لوڈشیڈنگ کا سلسلہ شروع کر دیا گیا، جس کے باعث شہری حلقوں میں شدید بے چینی اور غم و غصہ پایا جانے لگا۔شہریوں کی مسلسل شکایات اور بجلی کی ابتر صورتحال کا سخت نوٹس لیتے ہوئے چیئرمین ٹاؤن کمیٹی دوڑ چوہدری وسیم افضل راجپوت کی ہدایت پر ٹاؤن کمیٹی کی گاڑیوں کے ذریعے شہر سے کچرا اٹھا کر واپڈا دفتر کے مرکزی گیٹ کے سامنے رکھ دیا گیا اور بھرپور احتجاج کیا گیا۔ احتجاج کے دوران واپڈا عملہ دفتر سے غائب رہا، جبکہ مشتعل مظاہرین نے شدید نعرے بازی کرتے ہوئے اعلیٰ حکام سے فوری نوٹس لینے اور بجلی کی فراہمی میں بہتری لانے کا مطالبہ کیا۔ذرائع کا کہنا ہے کہ ٹاؤن کمیٹی دوڑ کا یہ منفرد احتجاج بالآخر رنگ لے آیا، جس کے بعد واپڈا انتظامیہ نے چیئرمین ٹاؤن کمیٹی چوہدری وسیم افضل راجپوت سے رابطہ کرتے ہوئے شہر میں لوڈشیڈنگ پر قابو پانے اور قبل ازیں طے شدہ زیرو لوڈشیڈنگ معاہدے پر مؤثر انداز میں عملدرآمد کی یقین دہانی کرا دی۔اس موقع پر چیئرمین ٹاؤن کمیٹی دوڑ چوہدری وسیم افضل راجپوت نے کہا کہ شہریوں کو غیر اعلانیہ لوڈشیڈنگ سے جلد ریلیف فراہم کیا جائے گا، جبکہ واپڈا حکام نے بھی صورتحال میں بہتری لانے کے لیے عملی اقدامات اٹھانے کی یقین دہانی کرائی ہے۔
شہری و سماجی حلقوں نے احتجاج کی کامیابی کو خوش آئند قرار دیتے ہوئے امید ظاہر کی ہے کہ اب شہر میں بجلی کی فراہمی کے نظام میں واضح بہتری آئے گی اور عوام کو غیر اعلانیہ لوڈشیڈنگ کے عذاب سے نجات مل سکے گی۔a