معرکہ حق کا ایک سال مکمل ہونے پر وزیراعلیٰ پنجاب مریم نواز کا اظہار تشکر، قومی ہیروز کو سلام عقیدت

لاہور:وزیراعلیٰ پنجاب مریم نواز نے معرکۂ حق کا سال مکمل ہونے پر اظہارِ تشکرکرتے ہوئے معرکۂ حق کے ہیروز کو سلام عقیدت پیش کیا-
وزیراعلیٰ مریم نواز نے وزیر اعظم شہبازشریف،فیلڈ مارشل عاصم منیراورائیر مارشل بابر ظہیر ایڈمرل نوید اشرف کو خراج تحسین پیش کیا اور کہاکہ 8۔۔صفر کا یہ معرکۂ حق دشمن کبھی فراموش نہیں کر پائے گا۔پاکستان کی فتح اور بھارت کی شکست کی گواہی دنیا نے دی اور دی جاتی رہے گی۔معرکۂ حق نے دشمن پر پاکستان کی ہیبت کا نشان ثبت کر دیا۔
وزیراعلیٰ مریم نواز نے کہاکہ معرکۂ حق نے ثابت کردیا ہم امن پسند ہیں مگر وقت آئے تو بنیان مرصوص بھی ہیں۔ معرکۂ حق تاریخ عالم میں پاکستان کی عظمت کا باب بن چکا ہے۔ معرکۂ حق میں دنیا نے دیکھا پوری قوم متحد اور یکسو ہوکر دشمن کے سامنے بنیان مرصوص بن گئی۔ پاک افواج اور پاکستانی عوام کے اتحاد نے د شمن کو سر جھکانے پر مجبور کردیا۔
وزیراعلیٰ مریم نوازنے کہاکہ بے باک قیادت نے معرکۂ حق میں تاریخی فتح کی بنیاد رکھی۔ آج دنیا بھر میں ہر محب وطن پاکستانی معرکۂ حق کی کامیابی پر خوشی منا رہا ہے۔ پنجاب میں ہر شہر ہر گاؤں ہر گلی کوچے میں خوشیاں منائی جارہی ہیں۔ طلباء، اساتذہ، تاجر،وکلاء، سیاستدان، کسان سمیت پوری قوم معرکۂ حق کی کامیابی کا جشن منا رہی ہے۔ پاکستان کے شاہینوں نے پیشہ ورانہ حربی مہارت کے ذریعے دشمن سے اپنی برتری کا لوہا منوایا۔