واشنگٹن ڈی سی :صدر ڈونلڈ ٹرمپ نے کہا ہے کہ ایران کے ساتھ مذاکرات کے متعلق انکے اور چند دوسرے لوگوں کے علاوہ کوئی نہیں جانتا، مذاکرات تعطل کے باوجود آگے بڑھ رہے ہیں۔ سی سی این کےذرائع کے مطابق ایران کی نظرثانی شدہ امن تجویز آج آ سکتی ہے۔
• جنگی اختیارات: ٹرمپ نے کانگریس کی ان کوششوں پر تنقید کی جن کا مقصد ان کے جنگی اختیارات کو محدود کرنا تھا، کیونکہ قانون ساز اور امریکی حکام اس بات پر متفق نہیں ہیں کہ آیا کانگریس کی اجازت کے بغیر فوجی طاقت کے استعمال کی قانونی آخری تاریخ گزر چکی ہے۔
جنگ جیت چکے۔۔۔ لیکن بڑے مارجن سے جیتنا چاہتے ہیں صدر ڈونلڈ ٹرمپ کا کہنا ہے کہ امریکا نے ایران کی جوہری صلاحیت کو مکمل طور پر ختم کر دیا ہے تاکہ وہ جوہری بم نہ حاصل کر سکے۔
آمریکی نشریاتی ادارے نیوزمیکس کو دیے گئے ایک انٹرویو میں امریکی صدر ڈونلڈ ٹرمپ نے ایک بار پھر کہا کہ ’ہم ایران میں جنگ جیت چکے ہیں‘ تاہم ان کا کہنا تھا کہ وہ اس جنگ کو ’مزید بڑے مارجن سے جیتنا چاہتے ہیں۔‘
سی بی ایس نیوز نے نیوزمیکس کا حوالہ دیتے ہوئے خبر دی ہے کہ امریکی صدر نے دعویٰ کیا ہے کہ ایران کی بحریہ اور فضائیہ تباہ ہو چکی ہیں اور ملک کی قیادت کو بھی ختم کر دیا گیا ہے۔ امریکی انتظامیہ جنگ کے ابتدائی دنوں سے ہی اس طرز کے دعوے یہ کرتی آ رہی ہے۔
تاہم اس معاملے سے متعلق خفیہ معلومات سے آگاہ متعدد امریکی حکام نے گذشتہ ہفتے سی بی ایس نیوز کو بتایا کہ ایران کے پاس اب بھی وائٹ ہاؤس اور پینٹاگون کی جانب سے عوامی طور پر تسلیم کردہ فوجی صلاحیتوں سے کہیں زیادہ صلاحیتیں موجود ہیں۔
ان حکام میں سے تین نے سی بی ایس نیوز کو بتایا کہ اپریل کے اوائل میں جنگ بندی کے آغاز تک ایران کے بیلسٹک میزائلوں کے ذخیرے کا تقریباً نصف حصہ اور ان سے منسلک لانچ سسٹمز محفوظ تھے۔
جمعرات کے روز صدر ٹرمپ کا کہنا تھا کہ ’ہم نے سب کچھ تباہ کر دیا ہے۔ اگر ہم ابھی نکل جائیں تو اگر وہ کر پائے تو بھی انھیں تعمیر نو میں 20 سال لگیں گے۔‘ تاہم ان کا مزید کہنا تھا کہ یہ ’کافی نہیں۔‘
صدر ٹرمپ نے ایک بار پھر کہا کہ ہمیں اس بات کی ضمانت چاہیے کہ وہ کبھی بھی جوہری ہتھیار حاصل نہیں کریں گے۔
اوول آفس میں صحافیوں سے بات کرتے ہوئے امریکی صدر نے دعویٰ کیا کہ ’میں آپ کو بتا سکتا ہوں کہ ایران کوئی معاہدہ کرنے کے لیے بے چین ہے۔‘
انھوں نے مزید کہا کہ امریکا نے ایران کی بحریہ اور فضائیہ کو ختم کر دیا ہے اور اس کی ڈرون فیکٹریاں 82 فیصد اور میزائل فیکٹریاں 90 فیصد ختم ہو چکی ہیں۔
امریکا کے وزیرِ خزانہ سکاٹ بیسنٹ کا کہنا ہے کہ واشنگٹن ایرانی حکومت کے بیرونِ ملک موجود پنشن فنڈز کے اکاؤنٹس منجمد کرنے پر غور کر رہا ہے۔
سکاٹ بیسنٹ نے فاکس نیوز کو دیے گئے ایک انٹرویو میں کہا کہ ناکہ بندی کے علاوہ امریکا ایران پر مزید سخت معاشی دباؤ برقرار رکھے گا۔