واشنگٹن: امریکا میں انسانی حقوق اور قانونی اصلاحات کے علمبرداروں کو اس وقت شدید جھٹکا لگا جب محکمہ انصاف (DOJ) نے سزائے موت کے حوالے سے ایک انتہائی ہولناک اور متنازع رپورٹ جاری کی۔ ٹرمپ انتظامیہ نے نہ صرف سزائے موت کے خلاف اپیل کے عمل کو مختصر کرنے کا فیصلہ کیا ہے بلکہ موت بانٹنے کے لیے قدیم اور وحشیانہ طریقے دوبارہ متعارف کروانے کی تجویز بھی دے دی ہے۔
محکمہ انصاف کی رپورٹ میں تجویز دی گئی ہے کہ وفاقی سطح پر سزائے موت دینے کے لیے ‘فائرنگ اسکواڈ’ (گولیاں مارنا)، ‘الیکٹرک چیئر’ (بجلی کا جھٹکا) اور ‘گیس کے ذریعے دم گھونٹنا’ (Gas Asphyxiation) جیسے طریقوں کو دوبارہ اپنایا جائے۔ انسانی حقوق کی تنظیموں نے اس پر شدید ردِعمل دیتے ہوئے کہا ہے کہ 21ویں صدی میں 1600ء اور 1800ء کے طریقے اپنانا امریکا کو پتھر کے دور میں واپس لے جانے کے مترادف ہے۔
رپورٹ میں سب سے خطرناک پہلو سزائے موت پانے والے قیدیوں کے لیے اپیل کے عمل کو محدود کرنا ہے۔ ماہرینِ قانون کے مطابق اپیل کا عمل ہی وہ واحد راستہ ہوتا ہے جس کے ذریعے بے گناہ افراد اپنی معصومیت ثابت کر سکتے ہیں، لیکن نئی پالیسی اس قانونی ڈھال کو کچلنے کی وکالت کر رہی ہے۔ انسانی حقوق کے وکلاء کا کہنا ہے کہ "ریاست اب انصاف سے زیادہ ‘قتل’ کرنے میں عجلت دکھا رہی ہے۔”
ماضی میں دوا ساز کمپنیوں نے سزائے موت کے لیے مہلک انجکشن فراہم کرنے سے انکار کر دیا تھا کیونکہ ان کے بقول یہ انسانیت کے خلاف ہے۔ اب ٹرمپ انتظامیہ نے تجویز دی ہے کہ حکومت خود ‘پینٹوباربیٹل’ جیسی ادویات تیار کرے تاکہ اسے نجی کمپنیوں پر انحصار نہ کرنا پڑے۔ اس اقدام کو "ریاستی سرپرستی میں قتل کی فیکٹری” قائم کرنے سے تشبیہ دی جا رہی ہے۔
سزائے موت کے خاتمے کی تحریک چلانے والے حلقوں (Anti-Death Penalty Advocates) کا کہنا ہے کہ صدر بائیڈن نے اپنے آخری دنوں میں 37 قیدیوں کی سزائے موت کو عمر قید میں بدل کر جو انسانی ہمدردی دکھائی تھی، صدر ٹرمپ اسے ‘خونی انتقام’ میں بدلنا چاہتے ہیں۔ ڈیموکریٹس اور کئی قدامت پسند مذہبی گروہوں نے بھی اس کی مخالفت کرتے ہوئے کہا ہے کہ یہ پالیسی امریکی آئین کی اس شق کی خلاف ورزی ہے جو "ظالمانہ اور غیر معمولی سزا” سے روکتی ہے۔
سیاسی پنڈتوں کا ماننا ہے کہ اگرچہ یہ تجاویز محکمہ انصاف کی ‘وش لسٹ’ میں شامل ہیں، لیکن انہیں کانگریس سے منظور کروانا ایک کڑا امتحان ہوگا، کیونکہ امریکا میں سزائے موت کی حمایت میں مسلسل کمی آ رہی ہے اور اسے ایک "ناکام اور ظالمانہ نظام” سمجھا جانے لگا ہے۔
پتھر کےدورمیں واپسی؟ ٹرمپ انتظامیہ کا سزائے موت کے لیے ‘فائرنگ اسکواڈ’ اور ‘زہریلی گیس’ بحال کرنے کا اعلان
