کراچی :پاکستان اسٹاک ایکسچینج (پی ایس ایکس) میں جمعرات کو بھی فروخت کا دباؤ دیکھا جارہا ہے جس کے نتیجے میں ٹریڈنگ سیشن کے دوران بینچ مارک کے ایس ای انڈیکس میں 3 ہزار سے زائد پوائنٹس کی کمی دیکھی گئی۔
دوپہر 1 بجکر 19 منٹ پر بینچ مارک 100 انڈیکس 3,058.09 پوائنٹس یا 1.78 فیصد کی کمی سے 168,521.21 پوائنٹس پر آگیا۔
مارکیٹ کے اہم شعبوں بشمول آٹوموبائل اسمبلرز، سیمنٹ، کھاد، تیل و گیس کی تلاش کرنے والی کمپنیوں، آئل مارکیٹنگ کمپنیوں اور پاور جنریشن میں فروخت کا دباؤ دیکھا گیا۔ انڈیکس میں بھاری وزن رکھنے والے حصص جیسے کہ حبکو، ماری، اوجی ڈی سی، پ او ایل، پی پی ایل، ایس این جی پی ایل، ایف ایف سی، ایم سی بی اور یو بی ایل بھی منفی زون میں دکھائی دیے۔
ایشیائی حصص کی قیمتوں میں وال اسٹریٹ (امریکی مارکیٹ) کی پیروی میں اضافہ دیکھا گیا جس کی قیادت جاپان، جنوبی کوریا اور تائیوان میں ریکارڈ بلندیوں نے کی۔ سرمایہ کاروں نے خلیج میں بحری جہازوں کی آمد و رفت کے بڑھتے مسائل کے باعث تیل کی قیمتوں میں اضافے کو نظر انداز کرتے ہوئے کمپنیوں کے مضبوط منافع پر توجہ مرکوز رکھی۔
راتوں رات، امریکی مارکیٹ میں ایس این پی 500 میں 1 فیصد اضافہ ہوا، جبکہ نیسڈیک 1.6 فیصد کی چھلانگ لگا کر نئی ریکارڈ بلندیوں پر بند ہوا۔
”بیچ دے“ بازارحصص میں شدید مندی، 100 انڈیکس 3 ہزار سے زائد پوائنٹس گرگیا
