ٹوکیو: جاپان میں 7.5 شدت درجے کا زلزلہ، عمارتیں لرزگئیں، شہری خوفزدہ، محکمہ موسمیات نے سونامی وارننگ جاری کردی۔ ابھی تک کسی جانی یا مالی نقصان کی اطلاع نہیں ملی ۔
جاپانی محکمہ موسمیات کا کہنا ہے کہ مزید بڑے 8.0 یا اس سے زیادہ شدت کے زلزلے آنے کا خطرہ بڑھ گیا ہے۔جاپان کے شمالی حصے میں آنے والے حالیہ شدید جھٹکوں، سونامی وارننگ کے بعد صورتحال غیر معمولی ہے۔ بڑے زلزلے کی ایڈوائزری جاری کردی گئی ہے۔
رپورٹ کے مطابق محکمہ موسمیات نے خبردار کیا ہے کہ سونامی کی لہریں 3 میٹر تک بلند ہو سکتی ہیں اور ابتدائی لہریں فوری طور پر ساحلی علاقوں سے ٹکرا سکتی ہیں۔
حکام نے ساحلی اور دریا کے کنارے رہنے والے افراد کو محفوظ مقامات، خصوصاً اونچی جگہوں یا مخصوص عمارتوں میں منتقل ہونے کی ہدایت جاری کر دی، بیان میں کہا گیا ہے کہ سونامی کی لہریں بار بار آ سکتی ہیں، اس لیے شہریوں کو خبردار کیا گیا ہے کہ وہ وارننگ ختم ہونے تک محفوظ مقامات نہ چھوڑیں۔
دوسری جانب جاپانی وزیراعظم کے دفتر نے ہنگامی صورتحال سے نمٹنے کے لیے کرائسز مینجمنٹ ٹیم قائم کر دی ہے۔