صدر زرداری کا چینی سفارتخانے کا غیر اعلانیہ دورہ، اسحاق ڈار چینی ہم منصب کی دعوت پرکل بیجنگ جائینگے

اسلام آباد: نائب وزیراعظم و وزیر خارجہ سینیٹر محمد اسحاق ڈار 31 مارچ کو چین کا اہم دورہ کریں گے۔ یہ دورہ چین کے وزیر خارجہ وانگ ای کی دعوت پر کیا جا رہا ہے۔
پاکستان اور چین کے درمیان ہر طرح کے حالات میں اسٹریٹجک تعاون پر مبنی شراکت داری قائم ہے جس میں علاقائی اور عالمی امور پر قریبی رابطہ اور باقاعدہ مشاورت شامل ہے۔
وزارتِ خارجہ کے ترجمان کے مطابق اسی تناظر میں یہ دورہ دونوں ممالک کو علاقائی صورتحال، دوطرفہ تعلقات اور باہمی دلچسپی کے عالمی امور پر تفصیلی تبادلہ خیال کا موقع فراہم کرے گا۔
ترجمان کے مطابق نائب وزیراعظم کا یہ دورہ اس بات کا ثبوت ہے کہ پاکستان چین کے ساتھ اپنے تعلقات کو کتنی اہمیت دیتا ہے خاص طور پر اس تناظر میں کہ وہ گزشتہ روز کندھے میں معمولی فریکچر کے باعث طبی مشورے کے باوجود یہ دورہ کر رہے ہیں۔
یادرہے صدر مملکت آصف علی زرداری نے گزشتہ رات چینی سفارتخانے کا غیر اعلانیہ دورہ کیا، جو کہ ملک میں جاری سفارتی سرگرمیوں کے دوران اہم قرار دیا جا رہا ہے۔ سفارتی ذرائع کے مطابق، یہ دورہ اسلام آباد میں چار ملکی مذاکرات کے مکمل ہونے کے بعد انجام دیا گیا۔