امریکا کا 15 نکاتی مجوزہ منصوبہ مسترد ، ایران جنگ بندی کے لیے پانچ شرائط پیش کر دیں

تہران :ایران کے سرکاری نشریاتی ادارے پریس ٹی وی کا کہنا ہے کہ تہران نے امریکہ کا 15 نکاتی مجوزہ مسترد کر دیا ہے اور اپنی شرائط پیش کر دی ہیں۔
پریس ٹی وی کے مطابق اسے ایک سینیئر سیاسی و سکیورٹی عہدیدار نے بتایا ہے کہ ایران صدر ٹرمپ کو اس جنگ کے خاتمے کے وقت کا تعین نہیں کرنے دے گا۔
اس عہدیدار کا مزید کہنا تھا کہ ’ایران اس جنگ کا اختتام اپنی مرضی کے وقت پر کرے گا جب اس کی شرائط مان لی جائیں گی۔‘
خیال رہے اس سے قبل متعدد میڈیا اداروں نے رپورٹ کیا تھا امریکہ نے بذریعہ پاکستان ایران کو یہ مجوزہ منصوبہ بھیجا ہے۔
ایرانی نشریاتی ادارے کے مطابق سیاسی و سکیورٹی عہدیدار نے اسے مزید بتایا کہ واشنگٹن متعدد سفارتی ذرائع سے مذاکرات کی کوشش کر رہا ہے اور ایسے پروپوزل پیش کر رہا ہے جو ایران کے نزدیک ’حدود سے تجاوز‘ کر رہے ہیں۔
اس عہدیدار نے پریس ٹی وی کے ساتھ مذاکرات کے لیے ایران کی پانچ شرائط بھی پیش کی ہیں:
اہلکار کے مطابق، تہران امریکی شرائط کو ’ضرورت سے زیادہ‘ سمجھتا ہے۔
اہلکار نے پانچ مخصوص شرائط کا خاکہ پیش کیا جن کے تحت ایران جنگ ختم کرنے پر رضامند ہو گا۔
دشمن کی طرف سے ’جارحیت اور قتل و غارت گری‘ کو مکمل روکنا۔
اسلامی جمہوریہ پر دوبارہ جنگ مسلط نہ ہونے کو یقینی بنانے کے لیے ٹھوس میکانزم کا قیام۔،
جنگی نقصانات اور معاوضے کی ضمانت اور واضح طور پر بیان کردہ ادائیگی۔
تمام محاذوں اور پورے خطے میں شامل تمام مزاحمتی گروہوں کے لیے جنگ کا اختتام۔
آبنائے ہرمز پر اختیار استعمال کرنے کے ایران کے خود مختار حق سے متعلق بین الاقوامی تسلیم اور ضمانتیں۔
انہوں نے کہا کہ یہ شرائط 2025 میں جنیوا میں پیش کی گئی شرائط کے علوہ ہیں۔