لاہور:حکومت نے ہنڈی کے کاروبار کے حوالے سے زیرو ٹالرنس کا اعلان کیا ہے اور بڑے منی لانڈرز کے خلاف مضبوط کارروائی کا آغاز کر دیا ہے۔ لاہور میں وفاقی وزیرداخلہ محسن نقوی اور وفاقی وزیر خزانہ محمد اورنگزیب کی زیر صدارت خصوصی اجلاس میں اس حوالے سے اہم فیصلے کیے گئے۔
اجلاس میں فیصلہ کیا گیا کہ منی لانڈرنگ اور ہنڈی کے کاروبار میں ملوث بڑے افراد اور اداروں سے کوئی رعایت نہیں برتی جائے گی اور ایسے عناصر کے خلاف شکنجہ مزید سخت کیا جائے گا۔ رقوم صرف بینکنگ اور دیگر قانونی چینلز کے ذریعے بیرون ممالک بھیجی جا سکیں گی، جبکہ منی چینلز کے ذریعے رقوم کی ترسیل کے عمل کو بھی سٹریم لائن کیا جائے گا۔
اجلاس میں مزید فیصلہ کیا گیا کہ بیرون ممالک رقوم بھیجنے کے پورے میکانزم کو شفاف اور فول پروف بنایا جائے گا اور غیر قانونی ذرائع سے رقوم بھجوانے کے تمام چینلز کی ہر سطح پر حوصلہ شکنی کی جائے گی۔
سٹیٹ بینک اور ایف آئی اے کا جوائنٹ ورکنگ گروپ تشکیل دینے کا بھی فیصلہ کیا گیا جو تمام متعلقہ امور پر باقاعدہ پیش رفت کا جائزہ لے گا۔ اجلاس میں گورنر سٹیٹ بینک نے بینکنگ چینلز سے رقوم کی ترسیل کے نظام پر بریفنگ دی۔ ڈی جی ایف آئی اے اور وفاقی سیکرٹری خزانہ نے بھی اجلاس میں شرکت کی۔
ہنڈی کے بڑے مگرمچھوں کے گرد گھیرا تنگ، وفاقی وزراء کا لاہور میں ہنگامی اجلاس، کیا ‘فول پروف’ میکانزم ڈالر کی اسمگلنگ اور غیر قانونی ترسیل کو روک پائے گا؟
