واشنگٹن +تہران :امریکا کے صدر ڈونلڈ ٹرمپ نے سوشل میڈیا پر جاری ایک بیان میں خبردار کیا ہے کہ جنگ کے دوران ایران کے مزید عہدیدار بھی اہداف بن سکتے ہیں۔ انہوں نے کہا کہ ’آج ایران کو بہت سخت ضرب لگے گیامریکی صدر ڈونلڈ ٹرمپ کی دھمکیوں کے بعد ایرانی صدر نے سخت ردعمل دیتے ہوئے کہا ہے کہ ایران اپنی خودمختاری اور قومی سلامتی کے دفاع کے لیے آخری سانس تک ثابت قدم رہے گا۔
ایرانی صدر مسعود پزشکیان نے سوشل میڈیا اکاؤنٹ ایکس پر جاری اپنے بیان میں کہا کہ ایرانی قوم کسی بھی دباؤ یا دھمکی کے سامنے جھکنے والی نہیں اور ملک کے دفاع کے لیے پوری قوت کے ساتھ ڈٹی رہے گی۔
ان کا کہنا تھا کہ ایران ہر قیمت پر اپنے وطن اور عوام کی حفاظت کرے گا۔
انہوں نے واضح کیا کہ ایران کی دفاعی کارروائیاں صرف ان اہداف اور تنصیبات کے خلاف ہوتی ہیں جہاں سے ایران اور ایرانی قوم کے خلاف جارحانہ اقدامات کیے جاتے ہیں۔
عرب نیوز کے مطابق صدر ٹرمپ نے سنیچر کو سوشل میڈیا پلیٹ فارم ٹروتھ سوشل پر لکھا کہ ایران، جو شدید دباؤ میں ہے، اپنے مشرقِ وسطیٰ کے ہمسایہ ممالک سے معافی مانگ چکا ہے اور یہ وعدہ کر چکا ہے کہ اب وہ ان پر فائرنگ نہیں کرے گا۔ یہ وعدہ صرف امریکا اور اسرائیل کے مسلسل حملوں کے باعث کیا گیا۔
امریکی صدر نے اپنے بیان میں یہ دھمکی بھی دی کہ حملوں کا دائرہ مزید نئے اہداف تک بڑھایا جا سکتا ہے۔ان کا مزید کہنا تھا کہ ایران کے نامناسب رویے کے باعث ایسے علاقے اور افراد بھی مکمل تباہی اور یقینی ہلاکت کے خطرے میں ہیں جنہیں اب تک نشانہ بنانے پر غور نہیں کیا گیا تھا۔