لاہور:(ملک ظہیر) سنٹرل پولیس آفس (CPO) میں آئی جی پنجاب عبدالکریم اور ڈائریکٹر جنرل پنجاب انفورسمنٹ اینڈ ریگولیٹری اتھارٹی (PERA) کیپٹن (ر) فرخ عتیق کے درمیان ایک اہم ملاقات ہوئی، جس میں ادارے کی فعالیت، درپیش چیلنجز اور مستقبل کے لائحہ عمل پر تفصیلی تبادلہ خیال کیا گیا۔
ملاقات کے دوران آئی جی پنجاب عبدالکریم نے کہا کہ وزیراعلیٰ مریم نواز شریف کی جانب سے ‘پیرا’ کا قیام عوامی فلاح و بہبود کے لیے ایک شاندار منصوبہ ہے۔ انہوں نے کہا کہ تجاوزات، ذخیرہ اندوزی اور منافع خوری جیسے مسائل کے سدباب کے لیے یہ ایک بہترین اور منظم فورس ثابت ہو رہی ہے۔
آئی جی پنجاب نے بتایا کہ پنجاب پولیس نے ‘پیرا’ کی تشکیل، آپریشنل امور اور ٹیکنیکل سپورٹ میں ہراول دستے کا کردار ادا کیا ہے۔پہلے مرحلے میں اتھارٹی کو 3 ہزار سے زائد پولیس افسران اور اہلکار فراہم کیے گئے۔پولیس ٹریننگ کالج چوہنگ میں ‘پیرا’ کے عملے کو 18 ہفتے کی خصوصی اور جدید تربیتی کورسز کروائے گئے۔
دوسرے مرحلے میں مزید 1300 سارجنٹس اور انویسٹی گیشن افسران کو جدید ترین ٹریننگ فراہم کی جائے گی تاکہ وہ فیلڈ میں قانونی تقاضوں کے مطابق فرائض سرانجام دے سکیں۔
ڈی جی پیرا کیپٹن (ر) فرخ عتیق نے ادارے کو فنکشنل کرنے میں پنجاب پولیس کے کلیدی کردار کو سراہا، جس پر آئی جی پنجاب نے انہیں یقین دلایا کہ مستقبل میں بھی آپریشنل اور ٹیکنیکل امور میں پولیس کی معاونت جاری رہے گی۔
اس موقع پر ایڈیشنل آئی جی ٹریننگ خرم شکور، ڈی آئی جی آئی ٹی منصور الحق، ڈی آئی جی اسٹیبلشمنٹ (ٹو) شارق کمال اور ایس پی پیرا محمد عمران بھی موجود تھے، جنہوں نے متعلقہ شعبوں میں تعاون بڑھانے پر اتفاق کیا۔